ԵՐԵՎԱՆ, 5 սեպտեմբերի — Sputnik. ԱՊՀ երկրների փորձագետները Երևանում քննարկում են միջազգային բեռնափոխադրումների ԱՊՀ երկաթուղիների քաղաքականությունը։
Սեպտեմբերի 5-ին Հայաստանի մայրաքաղաքում մեկնարկել է ԱՊՀ երկրների երկաթուղիների միջազգային բեռնափոխադրումների ոլորտում 2018 թ. սակագնային քաղաքականության նախագիծը մշակող փորձագիտական խմբի աշխատանքային խորհրդակցությունը:
«Սակագնային քաղաքականությունը բազային հիմք է։ Դա վերաբերում է ԱՊՀ-ի, Բալթյան երկրների և Վրաստանի տարածքում իրականացվող բեռնափոխադրումներին», — ասել է «Հարավկովկասյան երկաթուղիներ» ՓԲԸ-ի ֆիրմային տրանսպորտային սպասարկման ճանապարհային կենտրոնի պետի տեղակալ Զառա Աղասաֆյանցը։
«Ռուսական երկաթուղիներ» ԲԲԸ-ի ֆիրմային տրանսպորտային սպասարկման կենտրոնի գլխավոր տնօրենի տեղակալ Ալեքսանդր Խատյանովն իր հերթին նշեց, որ հոկտեմբերին տեղի է ունենալու XXVI սակագնային գիտաժողովը։
«Բոլոր երկաթուղիների վարչակազմները սակագնային քաղաքականության փոփոխման վերաբերյալ առաջարկություններ են ներկայացնելու», — ասել է Խատյանովը։
Նիստին մասնակցում են Հայաստանի, Բելառուսի, Վրաստանի, Ղազախստանի, Ղրղըզստանի, Լատվիայի, Ռուսաստանի, Տաջիկստանի, Ուզբեկստանի և Ուկրաինայի երկաթուղիների ներկայացուցիչները:
Խորհրդակցության շրջանակում փորձագետները կուսումնասիրեն անցած տարվա աշխատանքի արդյունքները, Սակագնային Համաձայնագրում փոփոխություններ կատարելու մասին առաջարկները, կքննարկեն առաջարկները ԱՊՀ երկրների երկաթուղիների միջազգային բեռնափոխադրումների ոլորտում 2018 թ. սակագնային քաղաքականության նախագիծ վերաբերյալ, ինչպես նաև հերթական Սակագնային գիտաժողով անցկացնելու հարցը։
