ԵՐԵՎԱՆ, 11 հոկտեմբերի — Sputnik. «Էրեբունի» բժշկական կենտրոնի մոտ հոկտեմբերի 10-ի, 22։00-ի մոտ կրակոց է հնչել։ Sputnik Արմենիաի հետ զրույցում տեղեկությունը հաստատեց Ոստիկանության ԶԼՄ-ների հետ կապի, վերլուծության և լրատվության կապի բաժնի պետ Էդգար Ջանոյանը։
Երկու մարդ հիվանդանոցի մոտ վիճաբանել են, ինչի ժամանակ նրանցից մեկը գազային ատրճանակ է կիրառել՝ նախազգուշացնող կրակոց արձակելով՝ դեպի օդ:
Ոստիկանության փոխանցմամբ, ոստիկանության աշխատակիցները պարզել են վիճողների ինքնությունը, նրանց հայտնաբերելու ուղղությամբ ձեռնարկվում են օպերատիվ-հետախուզական միջոցառումներ:
Նշենք, որ օրեր առաջ կրակոցներ էին հնչել «Արմենիա» բժշկական կենտրոնում։ ՔԿՀ աշխատակիցները բժշկական հետազոտման նպատակով «Արմենիա» բժշկական կենտրոն էին տեղափոխել ՔԿՀ-ում պատիժը կրող մի դատապարտյալի։ Բժշկական հետազոտման ժամանակ հիվանդասենյակ էր մուտք գործել զինված անձը և կրակոցներ արձակել՝ փորձելով պայմաններ ստեղծել դատապարտյալի փախուստի համար։ Զինված անձը ՔԿՀ աշխատակիցների կողմից վնասազերծվել էր, որի ընթացքում դատապարտյալը հափշտակել էր ՔԿՀ աշխատակիցներից մեկին ամրակցված ատրճանակը, կրակոցներ արձակել նրանց ուղղությամբ՝ փորձելով դիմել փախուստի։ Դատապարտյալը վնասազերծվել էր բժշկական կենտրոնի մուտքի մոտ, փախուստը՝ կանխվել։
