ԵՐԵՎԱՆ, 11 հոկտեմբերի — Sputnik. Աշխատանքային այցով Սոչիում գտնվող Նախագահ Սերժ Սարգսյանը մասնակցել է Եվրասիական տնտեսական բարձրագույն խորհրդի նիստին, հաղորդում է ՀՀ նախագահի պաշտոնական կայքը։
Խորհրդի նիստում քննարկված առանցքային թեմաներից մեկը մինչև 2025 թ. Եվրասիական տնտեսական միության թվային օրակարգի իրականացման հիմնական ուղղությունների քննարկումն էր: Նիստին ներկայացվել են 2018 թ. ընթացքում միության միջազգային գործունեության հիմնական ուղղությունները: Նախագահներին տեղեկություն է ներկայացվել ԵԱՏՄ Մաքսային օրենսգրքի վավերացման ընթացքի վերաբերյալ, որն ուժի մեջ կմտնի 2018թ. հունվարի 1-ից:
«Ընթացիկ տարվա առաջին 7 ամիսներին փոխադարձ առևտրի ծավալի շուրջ 28 տոկոս աճ ունենք՝ համեմատած նախորդ տարվա նույն ժամանակահատվածի հետ: 2017 թ-ի հունվար-հուլիս ամիսներին, 2016 թ-ի համապատասխան ժամանակահատվածի հետ համեմատ, Հայաստանի Հանրապետությունից ԵԱՏՄ երկրների շուկա ապրանքների արտահանման 29 տոկոս աճ է գրանցվել: Երրորդ երկրների հետ անդամ պետությունների արտաքին առևտրի ընդհանուր ծավալն աճել է ավելի քան 26 տոկոսով»,– իր ելույթում ասել է ՀՀ նախագահը` հավելելով, որ այդ միտումը պետք է ամրապնդել:
Դրա համար, Սերժ Սարգսյանն անհրաժեշտ է համարել համատեղ աշխատանքը առկա խոչընդոտներն ի հայտ բերելու և վերացնելու ուղղությամբ, առողջ մրցակցության միասնական կանոնների պայմաններում բիզնես վարելու համար անհրաժեշտ նախադրյալների ապահովումը:
Անդրադառնալով ԵԱՏՄ տարածքում թվային օրակարգի զարգացման խնդրին, Սերժ Սարգսյանը կարծիք է հայտնել, որ «թվային որոշումների մշակումը կարելի է սկսել էլեկտրոնային հաշիվ-ապրանքագրերի փոխադարձ ճանաչումից, քանզի հաշիվ-ապրանքագրերի փոխադարձ ճանաչումն առանցքային է մի շարք թվային նախաձեռնությունների համար:
ԵԱՏՄ ամրապնդման երրորդ քայլն, ըստ ՀՀ նախագահի, միջազգային մակարդակում համագործակցությունն է ինչպես Միության, այնպես էլ առանձին պետությունների մակարդակներում, տարբեր ինտեգրացիոն կառույցների միջև։
Այդ ենթատեքստում Սերժ Սարգսյանն ընդգծել է ԵԱՏՄ-Չինաստան առևտրատնտեսական համաձայնագրի շուրջ բանակցությունների սկզբունքային ավարտը:
«Կցանկանայի նաև հաստատել Իրանի հետ առաջիկայում համաձայնագրի ստորագրման տրամադրվածությունը, և ես վստահ եմ, որ դա մեր ընդհանուր մոտեցումն է: Հայաստանի վարչապետի՝ երեկ Իրան կատարած այցի ընթացքում այս հարցին անդրադարձ է կատարվել Իրանի Իսլամական Հանրապետության ղեկավարության հետ: Ես կարծում եմ, որ նրանք պատրաստ են շարունակել և ավարտել բանակցությունները առաջիկայում»,– ասել է ՀՀ նախագահը։
Ելույթի ավարտին Սերժ Սարգսյանը ներկաներին տեղեկացրել է, որ նախօրեին Հայաստանի Սահմանադրական դատարանը քննարկել է ԵԱՏՄ Մաքսային օրենսգրքի մասին պայմանագիրը, և առաջիկայում փաստաթուղթը կուղարկվի խորհրդարան վավերացման:
Խորհրդի նիստի օրակարգային հարցերից էր նաև Երկրի հեռակա զոնդավորման տվյալների ազգային աղբյուրների հիման վրա տիեզերական և գեոտեղեկատվական ծառայությունների մատուցման ոլորտում ԵԱՏՄ անդամ պետությունների համագործակցությունը:
Նիստին մասնակցել են Եվրասիական տնտեսական միության անդամ երկրների նախագահները, Ղրղըզստանի վարչապետը, Եվրասիական տնտեսական հանձնաժողովի կոլեգիայի նախագահ Տիգրան Սարգսյանը:
