ԵՐԵՎԱՆ, 10 հոկտեմբերի — Sputnik. Ազգային ժողովի պատգամավոր, ԵԽԽՎ-ում հայաստանյան պատվիրակության ղեկավար Արփինե Հովհաննիսյանը իր ֆեյսբուքյան էջում հայտնել է, որ ԵԽԽՎ նախագահ ընտրվեց Ստելա Կիրիակիդիսը` չնայած բոլոր այն աննախադեպ ճնշումներին, որ ԵԺԿ խմբի ղեկավարության ու բավական թվով անդամների կողմից կային նրա նկատմամբ:
«Ինչպես եվրոպացի գործընկերներիցս մեկը ճշգրիտ նկատեց, «այս ընտրությամբ Վեհաժողովը ինքն իրեն վերադարձրեց հույսը»: Նկատի ուներ, որ Վեհաժողովը չափազանց դժվարին պայմաններում, ի հակառակ մի շարք լոբբիստական ուղղությունների կարողացավ միավորվել իրականում անաչառ թեկնածուի շուրջ»,-գրել է նա:
Հովհաննիսյանի խոսքով` Ստելա Կիրիակիդիսը 132 քվե է ստացել, Էմանուելիս Զինգերիսը` 84 քվե։
Նշենք, որ ԵԽԽՎ նախկին նախագահ Պեդրո Ագրամունտը հոկտեմբերի 6-ին իր թվիթերյան էջում հայտնել էր ԵԽԽՎ նախագահի պաշտոնից հրաժարվելու մասին։
Մինչ այդ, ԵԽԽՎ գարնանային նստաշրջանում Վեհաժողովի բյուրոն անվստահություն էր հայտնել Ագրամունտին՝ նրան զրկելով Վեհաժողովի անունից բանակցություններ վարելու, պաշտոնական այցելություններ կատարելու կամ հայտարարություններով հանդես գալու իրավունքից։
