ԵՐԵՎԱՆ, 10 հոկտեմբերի — Sputnik. Աբրահամ Ռուսոն ու Մորելա Ֆերմանը 12 տարվա համատեղ կյանքից հետո հայտնվել են բաժանման եզրին, գրում է Дни.ру-ն։
Ռուսոն «Անդրեյ Մալախով. ուղիղ եթեր» հաղորդաշարի ընթացքում պատմել է ընտանիքում ծագած բարդությունների մասին։
Սկիզբ
2005 թվականին նրանք ամուսնացան, սակայն հենց հարսանիքի ժամանակ տեղի ունեցավ մի դեպք, որը հյուրերը վատ նախանշան համարեցին։ Փեսան ու հարսնացուն խառնեցին մատանիներն ու միմյանց մատներին սխալ մատանիներ դրեցին։
Մորելան հանուն ամուսնու քրիտոնեություն ընդունեց և դժվար պահերին սատարեց ամուսնուն։ Ծնվեցին դուստրերը` Էմանուելան ու Ավերմարիան։ Իսկ այսօր այս զույգը բաժանման եզրին է հայտնվել։
«Խնդիրները վաղուց են ծագել, բայց մենք այդ մասին չէինք խոսում, մտերիմները գիտեին այդ մասին։ Այսօր առաջին անգամ որոշեցի հրապարակավ խոսել։ Չնայած այդ ամենին, ես ուզում եմ պահպանել ընտանիքս` հանուն երեխաների ու այն սիրո, որը միավորում է ինձ ու կնոջս»,- ասել է Ռուսոն։
Նա նշել է, որ չի ցանկանում «բաժանման դառը համն» զգալ Մորելայի խանդի պատճառով։
Աբրահամը կարծում է, որ ինքը` որպես հանրահայտ երգիչ, իր երկրպագուներին սեր խոստովանելու իրավունք ունի։
Գո՞ւյք, թե՞ սեր
Երաժիշտը խոստովանել է, որ պատրաստվում է կիսել գույքը և համապատասխան փաստաթղթերն արդեն ուղարկել է կնոջը։
Նրանք անշարժ գույք ունեն ԱՄՆ-ում, որի արժեքը 300 միլիոն ռուբլի է կազմում։ Նյու Յորքում գտնվող հենց այդ տանն էլ այժմ ապրում են Մորելան ու դուստրերը։
Երգիչն ընդգծել է, որ իրեն ամենից շատ հետաքրքրում է մատուռը, որը կառուցվել է տան մեջ։
«Այնտեղ սրբապատկերներ են, սրբերի մասունքներ… հազարը գերազանցում են, ես երկար ժամանակ եմ հավաքել»,- ասել է արտիստը։
Այժմ նա 90 տարեկան մոր` Մարի Իփջյանի հետ ապրում է Մոսկվայում վարձակալած բնակարանում։
Եթերի ընթացքում տեսակապի միջոցով խոսել է նաև Մորելայի փաստաբան Օքսանա Սոկոլովան և նշել, որ իր պաշտպանյալի համար իսկական ցնցում է եղել գույքը կիսելու և ամուսնալուծվելու մասին խոսակցությունները։
Նա վստահեցրել է, որ երգիչը ստում է, երբ ասում է, որ ֆինանսապես օգնում է ընտանիքին. Նյու Ջերսիի տունը հիփոթեքով է վերցված, երգիչն էլ հսկայական պարտքեր ունի։ Մորելայի մյուս փաստաբան Ալեքսանդր Կարաժելեզն էլ հայտարարել է, որ գիտի ընտանիքում առկա դժվարությունների պատճառը։ Նրա խոսքով` Աբրահամի վրա մեծ ճնշում է գործադրվում։
«Երկրորդ երեխայի ծնվելուց հետո հայտնվեց մի խոստովանահայր, որը նրան հեռացրեց ընտանիքից»,- վստահեցրել է փաստաբանը։
Նա նշել է նաև, որ Ռուսոն ձեռք է բարձրացրել Մորելայի վրա։
Հաղորդման ավարտին հայտնվել է նաև Ռուսոյի կինը և խարդախության մեղադրանք ուղղել ամուսնուն։ Նա Անդրեյ Մալախովին ասել է, որ պատրաստ է հարցազրույց տալ և պատմել ամբողջ ճշմարտությունը։
