ԵՐԵՎԱՆ, 9 հոկտեմբերի – Sputnik. Ի՞նչ է լինելու 2018թ-ից հետո. իշխող Հանրապետական կուսակցությունը փակագծերը չի բացում։ «Սերժ Սարգսյանը մինչև 2018 թվականի ապրիլ նախագահելու է, և որևէ քննարկում չենք ունեցել, թե ինչ է կատարվելու ապրիլից հետո»,- այսօր ԱԺ-ում լրագրողներին ասաց ԱԺ ՀՀԿ խմբակցության ղեկավար Վահրամ Բաղդասարյանը։
Լրագրողների հարցապնդումներին Բաղդասարյանը պատասխանեց. «Երբ կգա ժամանակը, հարցադրում անելու կարիք չի լինի, Սերժ Սարգսյանն ինքը կխոսի այդ մասին»:
Իսկ քաղաքականության մեջ ՀՀԿ-ական գործիչը ոչինչ չբացառեց, այդ թվում նաև այն, որ 2018թ-ին, անվտանգության նկատառումներից ելնելով, Սերժ Սարգսյանը կլինի վարչապետ։
ՀՀԿ կոալիցիոն գործընկեր ՀՅԴ-ն ևս 2018թ-ի ապրիլի մասին խոսելն այս պահին ժամանակավրեպ է համարում։
«Կգա ժամանակը, և այդ հարցերի պատասխանները բոլորս միասին կունենանք»,- նույն հարցին ի պատասխան ասաց ԱԺ ՀՅԴ խմբակցության քարտուղար Աղվան Վարդանյանը։
«Կա օրենսդրություն, կա ՀՀԿ, որին, ըստ մեր համաձայնագրի, պատկանում է վարչապետի թեկնածություն առաջադրելու իրավունքը։ Երբ այդ իրավունքը կիրացվի, մենք այդ մասին կխոսենք»,- ասաց Վարդանյանը։
2016թ-ին հաստատված ՀՀ Սահմանադրությունն ամբողջությամբ ուժի մեջ կմտնի 2018թ-ի ապրիլից։ Դրա համաձայն` ՀՀ-ում վերջնականապես կփոխվի կառավարման կարգը` նախագահականից խորհրդարանականի։ Այդ փոփոխությունների արդյունքում վարչապետը կստանա ՀՀ ներկայիս նախագահին հավասարազոր իրավունքներ, իսկ երկրի նախագահի լիազորությունները կթուլանան։
