ԵՐԵՎԱՆ, 23 օգոստոսի — Sputnik. Խորհրդարանական այս աշնան հիմնական խնդիրը բյուջեի ընդունում է, նաև՝ օրենսդրական բազայի վերջնական ստեղծումը մինչև 2018-ի ապրիլ, երբ Հայաստանն ամբողջովին կանցնի կառավարման խորհրդարանական համակարգին: ԱԺ փոխխոսնակ Էդուարդ Շարմազանովը թեժ ու աշխատանքային աշնան սպասումներով է ավարտում արձակուրդը: Հասարակությունը դեպի քաղաքական աշուն գնում է նույն՝ գարնանային հարցադրումներով:
Ո՞վ է լինելու Հայաստանի վարչապետը 2018 թվականի ապրիլից հետո, երբ գործող նախագահն ավարտի պաշտոնավարման ժամկետն ու Հայաստանն անցնի կառավարման նոր համակարգին:
«Իմ պատասխանը չի փոխվի: Հիշում եք, երբ Նիկոլ Փաշինյանն ու Էդմոն Մարուքյանն Ազգային ժողովում վարչապետին հարցրին, թե արդյոք ի՞նքն է լինելու Հայաստանի հաջորդ վարչապետը: Կներեք, իսկ ձեզ համար ի՞նչ տարբերություն: Նախագահական ընտրություններ չկան, ՀՀԿ-ն ունի կայուն մեծամասնություն, կոալիցիոն համաձայնագրով վարչապետի պաշտոնի առաջադրումը պատկանում է բացառապես ՀՀԿ-ին: Ժողովուրդն իր ընտրությունն արել, վստահության քվեն ՀՀԿ-ին է տվել: Այսինքն՝ ընտրությունն արդեն եղել է: Երբ գա ժամանակը, այդ ժամանակ էլ կորոշենք՝ ով է լինելու վարչապետը»,- տեղեկացրեց ԱԺ փոխխոսնակը:
Մի բան, ըստ Շարմազանովի, հստակ է՝ ոչ հանրապետական վարչապետ Հանրապետականը չի առաջադրի:
«Վարչապետը կլինի մեր միջից: Հանրապետականը կընտրի այն թեկնածուին, ով լավագույնս կիրականացնի այդ գործառույթը: Ընդդիմադիրները թող հանգստանան: Վստահության մանդատը ՀՀԿ-ն ստացել է մինչև 2022 թվականը: Եթե ուզում են իրենք վարչապետ ընտրեն, թող սպասեն, կրկին փորձեն, գուցե բախտները ժպտա»,- ասաց Շարմազանովը:
ՀՀԿ խոսնակը բացառեց ՀՀԿ-ի և գործող վարչապետի միջև անհամաձայնությունների մասին բոլոր տեղեկությունները: ՀՀԿ-ում անձի երկատում չկա: Միասնաբար է իրականացվում ծրագիրը, որի գլխին կուսակցությունն է ու կուսակցության ղեկավարը: Առաջարկում է Կարեն Կարապետյանին չառանձնացնել ՀՀԿ-ից: Նա կուսակցության կարկառուն ներկայացուցիչներից է, ՀՀԿ նախագահի առաջին տեղակալը, հետևաբար քաղաքական գործունեությունը ՀՀԿ-ից անկախ չէ: Կարապետյանի կառավարությանն է վստահում նախագահը: ՀՀԿ խոսնակն ընդդիմությանը խորհուրդ է տալիս, ինչպես ասում են, խաղեր չտալ:
