ԵՐԵՎԱՆ, 9 հոկտեմբերի — Sputnik, Արմենուհի Մխոյան. Այսօր «Գյումրու ծննադատուն» ՓԲԸ–ում 26–ամյա Սաթենիկ Միրզոյանը եռյակ է լույս աշխարհ բերել։ Զարմանալին և ուրախալին այն է, որ եռյակն արհեստական բեղմնավորման արդյունք չէ։
Ամասիայում բնակվող Միրզոյանները փոքրիկների էին սպասում, սկզբում ծնողները գիտեին, որ երկու երեխա է լույս աշխարհ գալու, բայց Գյումրու ծննդատանը 26 —ամյա մայրիկին ասել էին՝ եռյակ է։
«Մեկ շաբաթ առաջ եմ իմացել, որ եռյակ եմ ունենալու, մինչև վերջ գիտեի, որ երկվորյակ է, բայց սեռերը մինչև ծնվելը չգիտեի։ Իրոք, անակնկալ էր, որ երկուսի փոխարեն երեքն ունեցա, եռյակ աղջիկների մայր դարձա»,- ասաց Սաթենիկը՝ փաստելով, որ իր երջանկությունը եռակի է։ Ի դեպ, քույրերին տանը արդեն 5 տարեկան եղբայրն է սպասում:
Երեք աղջիկների ծնունդով անչափ ուրախացած ծնողները նույնիսկ անուններ չեն հասցրել որոշել:
Ուրախությունը ոչ միայն Միրզոյաններին է, այլ նաև Գյումրու ծննդատանը՝ հաստատությունում վերջին 15 տարվա մեջ 1 եռյակն է ծնվել: Բժիշկները փաստում են՝ վերջին տարիներին եռյակ հաճախ է ծնվում, բայց հիմնականում արհեստական բեղմնավորմամբ, իսկ բնական եղանակով ավելի քիչ:
Երեխաները ծնվել են կեսարյան հատումով՝ 1 կիլոգրամ 500 գրամ, 1 կգ 600 գրամ և 1 կգ 700 գրամ քաշերով: Աղջիկների ու մայրիկի վիճակը բավարար է:
