ԵՐԵՎԱՆ, 9 հոկտեմբերի — Sputnik. Անկարան Վաշինգտոնին որոշմանը պատասխանել է նույնկերպ և հայտարարել, որ դադարեցնում է Թուրքիայի տարածքում դիվանագիտական բոլոր առաքելություններում ոչ ներգաղթային այցագրերի տրամադրումը։
«Վերջին իրադարձությունները ստիպել են Միացյալ Նահանգների կառավարությանը վերագնահատել ԱՄՆ առաքելության և անձնակազմի նկատմամբ Թուրքիայի կառավարության հանձնառությունը: Այդ վերագնահատման ընթացքում մեր դեսպանատուն և հյուպատոսություններ այցելուների թիվը կրճատելու համար մենք դադարեցրել ենք բոլոր ոչ ներգաղթային այցագրերի տրամադրումը Թուրքիայում գտնվող ԱՄՆ-ի բոլոր դիվանագիտական հաստատություններում»,- ասված է Թուրքիայում ԱՄՆ դեսպանատան հայտարարությունում, որը հրապարակվել է Twitter-ում:
Statement from the Turkish Mission to the U.S., October 8, 2017 pic.twitter.com/4i0BwInOCj
— TurkishEmbassyDC (@TurkishEmbassy) 8 октября 2017 г.
Անկարան նման հայտարարություն է տարածել Թուրքիայում ամերիկյան դեսպանության` նմանատիպ փաստաթղթի հրապարակումից մի քանի ժամ անց։ ԱՄՆ-ի դեսպանատունը հայտարարել էր, որ Միացյալ Նահանգների կառավարությունը խորապես մտահոգված է Ստամբուլում ամերիկյան գլխավոր հյուպատոսության աշխատակից Մեթին Թոփուզի ձերբակալության փաստով և համարում է, որ նրան առաջադրված մեղադրանքներն անհիմն են և խաթարում են Թուրքիայի հետ ունեցած գործընկերային վաղեմի հարաբերությունները։
ԱՄՆ դիվանագիտական առաքելության աշխատակիցը ձերբակալվել է Ստամբուլում նախորդ չորեքշաբթի՝ անցած տարի տապալված հեղաշրջման պատասխանատու համարվող ընդդիմադիր քարոզիչ Ֆեթհուլլահ Գյուլենի կազմակերպության հետ կապ ունենալու մեղադրանքով:
