ԵՐԵՎԱՆ, 7 հոկտեմբերի — Sputnik. Հնարավոր է արդյո՞ք միանգամից հաշվել բանավոր քեզ ընթերցվող տեքստի տառերի քանակը: Ֆրյազինոյի բնակիչ Նարեկ Ղևոնդյանն ապացուցեց, որ հնարավոր է` մասնակցելով «Զարմանալի մարդիկ» նախագծին:
Մոսկվայի շրջանում բնակվող հայը մասնակցեց «Զարմանալի մարդիկ» հեռուստաշոուի երկրորդ սեզոնի հինգերորդ եթերաշրջանին՝ ցուցադրելով իրական ժամանակում անծանոթ տեքստի տառերի արագ ընթերցման հմտությունները:
Առաջին փորձության ժամանակ առաջարկեցին հաշվել անվանի նեյրոֆիզիոլոգ Նատալյա Բեխտերևայի հայտնի արտահայտություններից մեկի տառերը: Նարեկն անմիջապես բարձրաձայնեց 291 թիվը, և այն համընկավ այն թվի հետ, որը հայտնվեց էկրանին: Այնուհետև նա հաշվեց, թե որքան տառ կա Ռոբերտ Ռոժդեստվենսկու բանաստեղծություններից մեկում` ճիշտ կռահելով տառերի քանակը, որոնք 284-ն էին: Մյուս պատասխանը նույնպես ճիշտ էր` 341 տառ:
Նարեկը կարողանում է տառերը հաշվել բարձրաձայն երեք լեզուներով` հայերեն, ռուսերեն և անգլերեն:
«Ռոսիա 1» հեռուստաալիքի եթերում հեռարձակվող «Զարմանալի մարդիկ» շոուն բացահայտում է բարձր ինտելեկտուալ մակարդակ ունեցող և արտասովոր ունակություններով օժտված մարդկանց:
