Հայաստանում առողջապահական զբոսաշրջության զարգացումը հեռանկարային ծրագիր է համարվում։ Այս ուղղությամբ կառավարությունն ու առողջապահական կազմակերպություններն արդեն նաև գործնական քայլեր են առաջարկում։ Այս մասին լրագրողների հետ զրույցում ասաց ՀՀ առողջապահության նախարար Լևոն Ալթունյանը։
«Մենք խնդիր ունենք ներկայացնելու մեր երկիրը լավագույն կողմից, իսկ դա հնարավոր է, որովհետև մենք ունենք բանիմաց բժիշկներ, շատ լավ, եվրոպական չափանիշներին համապատասխանող բժշկական կենտրոններ, ստեղծված ավանդույթներ և դպրոցներ, ինչպես ատամնաբուժության և պլաստիկ վիրաբուժության, այնպես էլ սրտի վիրահատությունների բնագավառում»,- ասաց նա:
Իսկ թե տարեկան որքան մարդ է այցելում Հայաստան կոնկրետ առողջապահական ծառայություններ ստանալու նպատակով, հայտնի չէ։ Մեր հարցին ի պատասխան նախարարը նշեց, որ նման պաշտոնական վիճակագրություն չկա:
