ԵՐԵՎԱՆ, 7 հոկտեմբերի — Sputnik. Հավաքական անվտանգության ուժերի կիրառման մասին որոշումն ընդունում է Հավաքական անվտանգության խորհուրդը, սակայն այդ ուժերի կիրառումը ներքին հակամարտություններում նախատեսված չէ, Հայաստանում անցկացվող «Որոնում-2017» զորավարժությունների ժամանակ ասաց ՀԱՊԿ միացյալ շտաբի պետ, գեներալ-գնդապետ Անատոլի Սիդորովը:
Նա նշեց, որ հասարակության որոշակի շրջաններում և ԶԼՄ-ներում կարծիք կա, որ Հայաստանում անցկացվող զորավարժությունները խախտում են երկրի ինքնիշխանությունը, սակայն դա այդպես չէ:
«Ամեն ինչ արվում է կոլեգիալ մակարդակով, փոխհամաձայնության հիմքով: Հաշվի է առնվում կազմակերպության բոլոր անդամների կարծիքը: Եթե Հայաստանը չցանկանար զորավարժություններն անցկացնել իր տարածքում, ոչ ոք դա չէր պնդի»,- ասաց Սիդորովը:
Նա կրկին ընդգծեց, որ ՀԱՊԿ-ը մտադիր չէ միջամտել ներքին հակամարտություններին:
