ԵՐԵՎԱՆ, 6 հոկտեմբերի — Sputnik. Ադրբեջանին ԵԱՏՄ-ում ընդգրկելու վերջնական որոշումը կախված է Հայաստանից։ Այս մասին ասել է Ռուսաստանի նախագահի` եվրասիական ինտեգրման հարցերով խորհրդական Սերգեյ Գլազևը։
«Եվրասիական տնտեսական միությունը բաց է բոլոր մասնակիցների համար, բայց այս պարագայում որոշումը կախված է Հայաստանից, քանի որ այն կոնսենսուսի հիման վրա է ընդունվում», —հայ-ռուսական միջտարածաշրջանային 6-րդ ֆորումի և Եվրասիական 2-րդ համաժողովի բացման ժամանակ ասել է նա։
Հայաստանը` որպես ԵԱՏՄ անդամ, կարող է օգտվել վետոյի իրավունքից։
Ընդ որում, Գլազևի խոսքով, հայտարարություններն այն մասին, թե ԵԱՏՄ-ն ԽՍՀՄ-ը վերականգնելու փորձ է, հիմարություն է, որն առաջին անգամ բարձրաձայնել է ԱՄՆ նախկին պետքարտուղար Հիլարի Քլինթոնը։
«ԵԱՏՄ-ն կառուցվում է առևտրի համաշխարհային կազմակերպության սկզբունքների վրա և ոչ ավելին։ Սա տնտեսական միավորում է», — ասել է նա։
Գլազևը նշել է, որ Միությունը ընդհանուր խորհրդարան և միասնական արժույթ չունի։ Նրա խոսքով` միասնական կառավարության ձևավորում չի սպասվում, ԵԱՏՄ միջկառավարական ասամբլեան լուծարվել է, որպեսզի ընդդիմախոսները մեղադրելու պատճառ չունենան։
