ԵՐԵՎԱՆ, 6 հոկտեմբերի — Sputnik. Ինձ պետք չի եղել պոլիկլինիկա այցելել, դրա համար էլ չեմ այցելել։ Տարեկան ամփոփիչ ասուլիսի ընթացքում այսպես պատասխանեց առողջապահության նախարար Լևոն Ալթունյանը Sputnik Արմենիայի այն հարցին` արդյո՞ք նախարարն առիթ է ունեցել դիմել պոլիկլինիկական ծառայությանը և ի՞նչ կարծիք ունի տրամադրվող որակի մասին։
«Գուցե այնքան էլ կարգապահ չեմ եղել, որ սկրինինգների գնամ։ Չեմ այցելել պոլիկլինիկա, որովհետև չեմ այցելել, ոչ թե բախտս բերել է, որ չեմ այցելել»,-ասաց նախարարը։
Ավելի վաղ Sputnik Արմենիայի հետ զրույցում նախարարը փառք էր տվել Աստծուն, որ չի հայտնվել պոլիկլինիկայում։ Սա երկիմաստության տեղիք էր տվել` կա՛մ նախարարն իրեն բախտավոր է համարում, որ չի «ընկել» այցելել պոլիկլինիկա, կա՛մ էլ դրա առիթը չի եղել։
«Մանուկ հասակում հաճախել եմ, գոհ եմ եղել պոլիկլինիկայից և անձնակազմից, դա վաղուց էր։ Արդեն նախարարի պաշտոնում գիտեմ պոլիկլինիկաների վիճակը, գիտեմ, որ դրանց մի մասը` 15-20 տոկոսը, վերանորոգման, 30-35 տոկոսը վերազինման ու արդիականացման կարիք ունեն»,- ասաց Ալթունյանը։
Նախարարը տեղեկացրեց, որ ժամանակացույցը կա, ըստ այդմ` պոլիկլինիկաներում որոշ գործողություններ կկատարվեն 2018 թվականին, որոշներն էլ կթողնեն մինչև 2020 թվականը։
Բայց նախարարն այդպես էլ ուղիղ խոսքով չպատասխանեց այն հարցին, թե արդյոք իրեն գոհացնում է պոլիկլինիկաներում ծառայությունների մատուցման որակը։
Մամուլում պարբերաբար հոդվածներ են հայտնվում, որտեղ տարբեր քաղաքացիներ դժգոհում են պոլիկլինիկաներում բժիշկների գործելաոճից։ Ոչ պաշտոնական տեղեկությունների համաձայն` պոլիկլինիկաների օպտիմալացման գործընթացով նպատակ կա առհասարակ հանել այդ ծառայության տրամադրումը։
