ԵՐԵՎԱՆ, 6 հոկտեմբերի — Sputnik. Հայաստանի ֆուտբոլի հավաքականի նախկին ֆուտբոլիստ Համլետ Մխիթարյանը ֆուտբոլային վերջին խաղը մեկնաբանել չի ցանկանում, քանի որ դա իր իրավասությունից դուրս է համարում։ Ասում է` մարզիչներ կան, որ ամեն ինչի մասին խոսել են։ Փոխարենը նա հիշում է 2007 թվականին կայացած Հայաստան-Լեհաստան խաղը, որի ժամանակ գոլ խփեց։
«Գոլը ես եմ խփել, բայց դա թիմային հաղթանակ էր։ Ֆուտբոլը մեկ կամ երկու հոգով չեն խաղում։ Ինձ համար կարևորը ոչ թե իմ խփած գոլն էր, այլ այն, որ հավաքականի հաղթելով` երկրպագուներն ուրախացան»,- Sputnik Արմենիային ասաց Մխիթարյանը։
Նրա խոսքով` այն ժամանակ Լեհաստանի հավաքականը չուներ անհատական ուժեղ ֆուտբոլիստներ, հիմա նրանք և կոլեկտիվ են լավ խաղում ու անհատապես։
«Ես Հայաստանի ֆուտբոլի հավաքականում խաղացել եմ երկար տարիներ, անկախ ամեն ինչից ես միշտ լավատես եմ, մեր ժամանակ էլ են եղել ցավալի պարտություններ, բայց մենք առաջ ենք նայել։ Ֆուտբոլը դրանով է հետաքրքիր»,-ասաց նա։
Համլետ Մխիթարյանը համզոված է, որ պետք չէ ամեն պարտությունից հետո քննադատել բոլորին` ֆուտբոլիստներին ու մարզիչներին։ Ամենակարևոր, ըստ նրա, այն է, որ դժվար պահերին բոլորը պետք է լինեն մեր հավաքականի կողքին։
Հոկտեմբերի 5-ին Երևանի «Հանրապետական» մարզադաշտում կայացավ ֆուտբոլի 2018 թ. աշխարհի առաջնության ընտրական փուլի Հայաստան-Լեհաստան հանդիպումը: Խաղն ավարտվեց մեր թիմի ջախջախիչ պարտությամբ՝ 1:6:
