ԵՐԵՎԱՆ, 6 հոկտեմբերի — Sputnik. Եվրասիական տնտեսական միությունը թույլ տվեց իր մասնակիցներին ընդլայնել ինքնիշխանությունը, կարծում է Եվրասիական տնտեսական հանձնաժողովի նախագահ Տիգրան Սարգսյանը։
«Իրավիճակի բացառիկությունն այն է, որ անդամ–երկրները ԵԱՏՄ–ի շրջանակներում լրացուցիչ լիազորություններ են ստացել և ընդլայնել իրենց տնտեսական ինքնիշխանությունը։ Սա նշանակում է, որ անկախ բնակչության քանակից, համախառն ազգային արտադրանքից, տարածքից, մենք բոլորս հավասար իրավունքներ ու որոշումներ կայացնելու հնարավորություն ունենք,որոնք տարածվում են ողջ Եվրասիական միության վրա»,– ասել է Սարգսյանը հայ–ռուսական 6-րդ միջտարածաշրջանային համաժողովի բացման ժամանակ։
Նրա խոսքով` երկրները վետոյի իրավունք ունեն բոլոր այն որոշումների վրա, որոնք ընդունում է Եվրասիական Խորհուրդը։
Սարգսյանը կարծում է, որ պերտությունները կարող են ներկայացնել իրենց ամբողջ ներուժը, և այն բնագավառները, որոնք կարող են օգտակար լինել միության համար։
«Դա մեծ ներուժ է պարունակում տնտեսական աճի համար»,– ասել է Սարգսյանը։
Նա նաև ուշադրություն է հրավիրել այն հանգամանքին, որ համաժողովի կարևորագույն հարցերից մեկը թվային օրակարգն է։ Սարգսյանի խոսքով` ԵԱՏՄ կառավարությունը ուշադրության կենտրոնում են պահում թվային տրանսֆորմացիաների թեման։ Մենք հետևյալ մտահղացումն ունենք` անհրաժեշտ է բացահայտել հիմնական թրենդները և այն համեմատական առավելությունները, որոնց տիրապետում ենք։
