ԵՐԵՎԱՆ, 6 հոկտեմբերի — Sputnik. ԵԱՏՄ անդամ երկրների տարածքում քննարկվում է արդյունաբերական կոոպերացիաների ստեղծման հնարավորությունը: Այսօր Sputnik Արմենիայի հետ զրույցում ներկայացնելով եվրասիական տնտեսական տարածքում առավել ակտուալ ծրագրերը` նշեց ՀՀ տնտեսական զարգացման և ներդրումների նախարար Սուրեն Կարայանը:
«Դրանք համատեղ ձեռնարկություններ են թե՛ անդամ երկրների, թե՛ առանձին կազմակերպությունների միջև»,- ներկայացնելով կոոպերատիվ արդյունաբերության տեսլականը՝ նշեց Կարայանը:
Մանրամասնելով կոոպերատիվների ստեղծման ծրագիրը՝ ՀՀ տարածքային կառավարման և զարգացման նախարարի առաջին տեղակալ. Վաչե Տերտերյանը նշեց, որ դրանով նախատեսվում է վերականգնել խորհրդային հանրապետությունների արդյունաբերական համագործակցության փորձը:
«Ժամանակին մենք արդյունաբերության տարբեր ճյուղերով կոոպերացվում էինք՝ մի տեղ մի մասն էր արտադրվում, մեկ այլ տեղ՝ մյուսը: Հիմա մենք Շիրակում, Վանաձորում փորձում ենք գտնել մեր նախկին կապերը ռուսական շուկաներում, որպեսզի կարողանանք այդ արտադրությունները վերագործարկել»,- ասաց Տերտերյանը:
Փոխնախարարի խոսքով, ռուսական կողմը հետաքրքրված է համատեղ արտադրությունների հիմնումով, կան նաև պայմանավորվածություններ:
Որպես օրինակ Վաչե Տերտերյանը նշեց, որ նախատեսվում է վերականգնել ու վերագործարկել Շիրակի մարզի երբեմնի հզոր մեքենաշինական արտադրություններն ու Վանաձորի քիմիական գործարանը:
Ժամկետներ առայժմ չեն հրապարակվում:
