ԵՐԵՎԱՆ, 5 հոկտեմբերի — Sputnik. ՀՀ ազգային ժողովը հոկտեմբերի 5-ի նիստում վավերացրեց «ՀՀ և ՌԴ միջև՝ ՀՀ Զինված ուժերի և ՌԴ Զինված ուժերի զորքերի (ուժերի) միացյալ խմբավորման մասին» համաձայնագիրը վավերացնելու մասին ՀՀ օրենքի նախագիծը:
Պատգամավորներից 83-ը կողմ քվեարկեցին համաձայնագրին։ Նախագծին դեմ էր «Ելք» խմբակցությունը:
Նախօրեին համաձայնգրի քննարկումների ժամանակ ԱԺ փոխխոսնակ Էդուարդ Շարմազանովը նշել էր, որ այս զորախումբը դե ֆակտո գործում է։
«Դրա մասին նախագահն է անցյալ տարի հայտարարել, և սա գաղտնիք չէ, պետք չէ զարմանալ, որ կա նման զորախումբ, որ հայ-ռուսական ուժերը պետք է միասին պայքարեն անվտանգության սպառնալիքների դեմ: Այո, մենք գտնվում ենք նույն անվտանգության համակարգում»,- ասել էր նա:
Նրա խոսքով` եթե մարդիկ գտնում են, որ դա պետք է փոփոխության ենթարկվի, քաղաքական ճաշակի խնդիր է, ինքն այդպես չի կարծում։
Շարմազանովը բացառել էր Ադրբեջանի հետ նմանատիպ պայմանագիր կնքելու հավանականությունը։
Հայ-ռուսական միացյալ զորախումբ ստեղծելու մասին համաձայնագիրը ստորագրվել է 2016 թվականի նոյեմբերի 30-ին Մոսկվայում։ Այս տարվա մարտի 15-ին ՀՀ և ՌԴ նախագահները Կրեմլում կայացած բանակցություններից հետո բարձր գնահատական էին տվել ստեղծվող միացյալ զորախմբին։
Միացյալ զորախմբի հրամանատարը նշանակվում է և պաշտոնից հեռացվում Հայաստանի ԶՈՒ Գերագույն հրամանատարի` նախագահի կողմից՝ Ռուսաստանի ԶՈՒ գլխավոր հրամանատարի հետ համաձայնեցմամբ։
Խաղաղ ժամանակ հրամանատարությունը ենթարկվում է ՀՀ ԶՈՒ գլխավոր շտաբի ղեկավարին, անմիջական վտանգի և պատերազմի ժամանակ` կախված ստեղծված իրավիճակից, ռուսական բանակի ՀՌՕ զորքերի հրամանատարությանը կամ ՀՀ ԶՈՒ շտաբի ղեկավարների կոմիտեին, երկու երկրների ԶՈՒ գլխավոր հրամանատարների որոշմամբ։
