ԵՐԵՎԱՆ, 4 հոկտեմբերի — Sputnik. ՀԱՊԿ-ի անդամակցությունն անհրաժեշտություն է Հայաստանի համար, այսօր ԱԺ-ում հայ-ռուսական միացյալ զորախումբ ստեղծելու քննարկումների ժամանակ հայտարարեց ՀՀ ազգային ժողովի փոխխոսնակ Էդուարդ Շարմազանովը։
«Մենք ընտրել ենք ՀԱՊԿ-ն, որովհետև այլընտրանք չկա: ՀԱՊԿ–ի այլընտրանքը Թուրքիան է, իսկ մենք այնտեղ անելիք չունենք»,- ասաց նա։
Շարմազանովի խոսքով` Հայաստանի և Ռուսաստանի հարաբերությունները դաշնակցային բնույթ են կրում, իսկ այս երկու երկրներն ընդգրկված են անվտանգության նույն համակարգում՝ ՀԱՊԿ-ում:
«Այս զորախումբը դե ֆակտո գործում է, դրա մասին նախագահն է անցյալ տարի հայտարարել, և սա գաղտնիք չէ, պետք չէ զարմանալ, որ կա նման զորախումբ, որ հայ-ռուսական ուժերը պետք է միասին պայքարեն անվտանգության սպառնալիքների դեմ: Այո, մենք գտնվում ենք նույն անվտանգության համակարգում»,- ասաց նա:
Նրա խոսքով` եթե մարդիկ գտնվում են, որ դա պետք է փոփոխության ենթարկվի, քաղաքական ճաշակի խնդիր է, ինքն այդպես չի կարծում։
Շարմազանովը բացառեց Ադրբեջանի հետ նմանատիպ պայմանագիր կնքելու հավանականությունը։
«Անհնար է նման բան, քանի որ նախ պետք է լինի համապատասխան իրավապայմանագրային բազա: Ադրբեջանն ու Ռուսաստանը անվտանգության տարբեր համակարգերի մեջ են»,- ասաց Շարմազանովը` ընդգծելով, որ Ադրբեջանի դաշնակիցը Թուրքիան է։
Հայ-ռուսական միացյալ զորախումբ ստեղծելու մասին համաձայնագիրը ստորագրվել է 2016 թվականի նոյեմբերի 30-ին Մոսկվայում։ Այս տարվա մարտի 15-ին ՀՀ և ՌԴ նախագահները Կրեմլում կայացած բանակցություններից հետո բարձր գնահատական էին տվել ստեղծվող միացյալ զորախմբին։
Միացյալ զորախմբի հրամանատարը նշանակվում է և պաշտոնից հեռացվում Հայաստանի ԶՈՒ Գերագույն հրամանատարի` նախագահի կողմից՝ Ռուսաստանի ԶՈՒ գլխավոր հրամանատարի հետ համաձայնեցմամբ։
Խաղաղ ժամանակ հրամանատարությունը ենթարկվում է ՀՀ ԶՈՒ գլխավոր շտաբի ղեկավարին, անմիջական վտանգի և պատերազմի ժամանակ` կախված ստեղծված իրավիճակից, ռուսական բանակի ՀՌՕ զորքերի հրամանատարությանը կամ ՀՀ ԶՈՒ շտաբի ղեկավարների կոմիտեին, երկու երկրների ԶՈՒ գլխավոր հրամանատարների որոշմամբ։
