ԵՐԵՎԱՆ, 4 հոկտեմբերի — Sputnik. Թուրքիան հայտարարել է, որ պատրաստվում է տիեզերակայան կառուցել։ Արձագանքելով այդ հայտարարությանը, «Վերադարձ» հիմնադրամի նախագահ Արագած Ախոյանը կարծում է, որ Թուրքիայի ներսում կան բազմաթիվ չլուծված խնդիրներ, լավ կլինի՝ այդ ուղղությամբ ծախսի նա փողը։
«Խորհուրդ կտայի Թուրքիային՝ այդ ահռելի գումարները, որ ուզում է ներդնել տիեզերակայան կառուցելու համար, ծախսի իր չլուծված խնդիրների լուծման նպատակով: Խնայի այդ գումարներն ու օդերից իջնի ներքև և ցամաքում սկսի իր հիմքերն ամրացնել: Թուրքիայի հիմքերն այնքան խարխուլ են, որ տիեզերքում այդ կայանը երբեք չի դիմանա»,- ասաց Ախոյանը։
Արագած Ախոյանը մեր հարևաններին հորդորում է մինչև ցուցադրականին անցնելը, նախ պարտադիր ծրագիրը կատարել: Ըստ Ախոյանի՝ այդ երկիրը պետք է մտածի մյուս պետություններից խլած գումարները վերադարձնելու մասին, քանի որ այդ երկրի տնտեսության մոտ կեսը կառուցված է այլ ազգերից, հատկապես՝ հայերից խլած ունեցվածքի վրա:
«Այնպես որ, վաղ է, խորհուրդ չեմ տա, իսկ մշակութային կայաններ կառուցելու շատ վայրեր կան, թող սկսեն Վանից, Մուշից, Դերսիմից, Էրզրումից և, միգուցե, գան հասնեն մինչև Անկարա»,- ասաց Ախոյանը։
