Ալեքսեյ Ստեֆանով, Sputnik.
Երեքշաբթի երեկոյան «Ռոսիա» թատրոնում անցկացվեց ՏԷՖԻ մրցանակաբաշխությունը։ «Օրֆեյ» հատուկ մրցանակին արժանացավ «Ты супер!» երգի մրցույթի եզրափակիչ փուլը։
«Չեք պատկերացնում, թե ինչ զգացողություն է, երբ քեզ է մոտենում 7 տարեկան մի տղա, որը կյանքում առաջին անգամ է իր փոքր քաղաքից, մանկատնից դուրս մեկնել և հայտնվել Մոսկվայում` հեռուստատեսությունում, գրկում է քեզ, ասում «շնորհակալություն» և հեռանում։ Իսկապես, մեծ բան արժե։ Կարծում եմ` սա բոլորիս համար է ամենաարժեքավորը», — մրցանակը ստանալու ժամանակ ասաց ՆՏՎ հեռուստաընկերության գլխավոր պրոդյուսեր Տիմուր Վայնշտեյնը։
Sputnik միջազգային լրատվական գործակալության ու ՆՏՎ հեռուստաալիքի «Ты супер!» նախագիծը միավորել էր 92 երգչի Ռուսաստանի, Աբխազիայի, Ադրբեջանի, Հայաստանի, Բելառուսի, Վրաստանի, Ղազախստանի, Ղրղըզստանի, Մոլդովայի, Ուկրաինայի, Էստոնիայի ու Հարավային Օսեթիայի մանկատներից ու գիշերօթիկ դպրոցներից։ Մրցույթի եզրափակիչ փուլ էին դուրս եկել 10 երեխա, իսկ հաղթող էր ճանաչվել Վալերկա Ադլեյբան (Աբխազիա)։
Երգի մրցույթից հետո կազմակերպիչները որոշեցին նաև պարային մրցույթ կազմակերպել։ «Ты супер! Танцы» մրցույթը մեկնարկեց սեպտեմբերին, շուրջ 150 մասնակցի հաջողություններին կարելի է հետևել ՆՏՎ հեռուստաալիքի եթերում յուրաքանչյուր շաբաթ օրը կամ ամեն օր Sputnik գործակալության կայքերում։ Այս նախագծի հաղորդավարը Ալեքսանդր Օլեշկոն է, ժյուրիի կազմում ընդգրկվել են թատերական բեմադրությունների պարուսույց և ռեժիսոր Եգոր Դրուժինինը, բալետի պարուհի և Մեծ թատրոնի առաջատար մենապարուհի Քրիստինա Կրետովան, պարուսույց Եվգենի Պապունաիշվիլին, թատրոնի և կինոյի դերասանուհի Անաստասիա Զավորոտնյուկը։
Պարային մրցույթից հետո Sputnik միջազգային լրատվական գործակալությունն ու ՆՏՎ հեռուստաընկերությունը կանցկացնեն նաև «Ты супер» երգի երկրորդ մրցույթը։ Պատանի երգիչների ընտրական փուլն արդեն մեկնարկել է։
