ԵՐԵՎԱՆ, 30 սեպտեմբերի — Sputnik. «Ты супер! Танцы» նախագծի հայ մասնակիցները` «Թռչունյաց տուն» կրթահամալիր-մանկատան սաներ Աստղիկ Մխիթարյանն ու Դավիթ Այվազյանը, քիչ առաջ առաջին անգամ ելույթ ունեցան Մոսկվայում և «Շալախո» պարեցին։ Ժյուրին նրանց պարը բարձր գնահատեց, և Աստղիկն ու Դավիթն անցան հաջորդ փուլ։
«Այս պարը բացահայտում է հայ տղամարդու կերպարը և ընդգծում հայ կնոջ նրբությունը»,- ավելի վաղ Sputnik-ի հետ զրույցում ասել էր Դավիթը։
Ժյուրիի անդամ Քրիստինե Կրեպովան ելույթից հետո հիացմունքի խոսքեր ասեց։
«Ինձ դուր եկավ, թե ինչպես էիք վերաբերվում միմյանց։ Արտակարգ կատարում էր»,- ասաց ժյուրիի մյուս անդամը`Եվգենի Պապունաշվիլին։
Իսկ նախագծի վարող Ալեքսանդր Օլեշկոն նշեց. «Վստահ եմ, որ ամբողջ Հայաստանն ու ձեր մանկատունն այժմ երկրպագում են ձեզ»։
Դավիթն ու Աստղիկը 16 տարեկան են: Աստղիկը դեռ դպրոց է հաճախում, քանի որ 7 տարեկանում է դպրոց ընդունվել, իսկ Դավիթը սկսել է դպրոց հաճախել վեց տարեկանից: Այս տարի նա ընդունվել է Գյումրու գեղարվեստական ակադեմիայի թատերական արվեստի բաժին: Մանկատուն է եկել առաջին դասարանում, իսկ Աստղիկը «Թռչունյան տուն» կրթահամալիր-մանկատանն է հայտնվել հինգ տարի առաջ:
«Ты супер! Танцы» միջազգային մրցույթը, որն անցկացնում են ՆՏՎ հեռուստաընկերությունը և Sputnik գործակալությունն ու ռադիոն, միավորել է Ռուսաստանի, ԱՊՀ-ի ու Բալթյան երկրների տարբեր անկյուններում բնակվող տաղանդավոր երեխաներին և նրանց նվիրական երազանքներն իրականացնելու հնարավորություն է տվել։
«Ты супер! Танцы» միջազգային մրցույթի պրեմիերան կայացել է սեպտեմբերի 2-ին։ Նախագծին մասնակցում են ավելի քան 140 պատանի պարող 10 երկրից։
