ԵՐԵՎԱՆ, 4 հոկտեմբերի–Sputnik. Գոհար Սարգսյան. Ռումինիայի հայ համայնքում իրենց հայ է համարում ընդամենը երկու հազար մարդ։ Սա այն դեպքում, երբ Ռումինիայում ապրող հայերի թիվը մի քանի անգամ ավելի շատ է։
Ըստ 2002 թ. մարդահամարի` հայկական ծագմամբ ռումինացիների թիվը զգալիորեն մեծ է, բայց շատերը հրաժարվում են արմատներից։ Ռումինիայի հայոց թեմի առաջնորդ տեր Տաթև եպիսկոպոս Հակոբյանը Sputnik Արմենիայի հետ զրույցում հաստատեց` տարիներ անց խնդիրը ոչ թե մեղմվել, այլ ավելի է սրվել։
«Դժբախտաբար, այստեղ քչերն են հայերեն խոսում, հիմնականում, շփվում են ռումիներեն։ Արդեն 1000 տարի է, ինչ Ռումինիայի թեմն իր թևի տակ է առել համայն հայությունն ու մեծ առաքելություն ունի Սփյուռքի մեջ։ Եկեղեցին այն վայրն է, որ համայն հայությունը հավաքվում է մեկ նպատակով` մնալ հայ, հետամուտ լինել Հայաստանի խնդիրներին, հետապնդել Արցախի հիմնախնդիրներն ու պահպանել հայոց հարցը»,– ասաց Ռումինիայի հայոց թեմի առաջնորդ տեր Տաթև եպիսկոպոս Հակոբյանը։
Տեղի հայկական եկեղեցին որոշել է օրինակ ծառայել հայերին։ Տեր Տաթև եպիսկոպոս Հակոբյանը բոլոր քարոզները հայերեն է կատարում, հայ համայնքի ներկայացուցիչների հետ միայն հայերեն է խոսում, չնայած՝ այլ լեզուներ էլ գիտի։
Ռումինիայի հայ համայնքի ամենահայտնի հայերից է Վարուժան Փամբուկչյանը։ Նա այդ երկրի խորհրդարանի տեղեկատվական տեխնոլոգիաների և կապի հանձնաժողովի նախագահն է։ Նա առաջադրվել է անգամ «Ավրորայի» մրցանակի։ Նա ավելի քան 600 օրենսդրական նախաձեռնության հեղինակ է և մեծ ներդրում ունի ինչպես հայապահպանության, այնպես էլ տեղի տնտեսության զարգացման գործում ։
Նա ևս կարծում է, որ հայի ինքնությունը պահպանելու համար կարևորագույն գործոն է եկեղեցին ու նաև դպրոցը։
«Կարևոր է հասարակության մաս լինել, հիշել, որ դու հայ ես, բայց ինչ-որ բանի հասնել նաև ռումինական հասարակության մեջ»,– ասել է Փամբուկչյանը։
Տեղեկացնենք, որ Ռումինիայում առաջին հայ պատգամավորն էլ Վարուժան Ոսկանյանն էր։ Մեծ գործ անելով Ռումինիայում ազգային փոքրամասնությունների իրավունքների պաշտպանության հարցում` նա էստաֆետը փոխանցել է Վարուժան Փամբուկչյանին։
Ռումինիայում դեռ կան հայեր, որոնք համառորեն պայքարում են հայի ինքնության պահպանման համար։
