ԵՐԵՎԱՆ, 3 հոկտեմբերի — Sputnik. Հայաստանում հոկտեմբերի 1-ին հայ տղամարդը սեքսուալ բռնության է ենթարկել Չինաստանի 30-ամյա քաղաքացուն։ ՀՀ Քննչական Կոմիտեն հայտնում է, որ դեպքը տեղի է ունեցել Խոր Վիրապի մոտ, երբ չինուհին վերադառնալիս է եղել վանական համալիրից։
Տուժողն իրավապահներին հայտնել է, որ ճանապարհին անծանոթ մի տղամարդ առաջարկել է իր ավտոմեքենայով տեղափոխել Երևան, բայց ավտոմեքենան վարել է այլ ուղղությամբ, որտեղ նրան բռնաբարել է։
Կինը, նկատելով այդ տարածքով անցնող մեկ այլ ավտոմեքենա, կարողացել է դիմել փախուստի և օգնություն խնդրել։ Ավտոմեքենայի վարորդն ու ուղևորը օտարերկրյա կնոջը տեղափոխել են իրենց տուն, իսկ հաջորդ օրը ճանապարհել Երևան։
ՀՀ քննչական կոմիտեի Արարատի մարզային քննչական վարչության Վեդիի քննչական բաժնում դեպքի առթիվ հարուցվել է քրեական գործ։
Կասկածյալի ինքնությունը բացահայտված է, նա ձերբակալվել է։
