ԵՐԵՎԱՆ, 3 հոկտեմբերի — Sputnik. Սեպտեմբերի 30-ին Վրաստանի Գումբուրդո գյուղի ազգությամբ հայ բնակիչների և վրացի ոստիկանների միջև տեղի ունեցած բախումների կապակցությամբ ՀՀ Մարդու իրավունքների պաշտպանի աշխատակազմը կապ է հաստատել Վրաստանի hանրային պաշտպանի աշխատակազմի հետ: Արման Թաթոյանը հարցը մի քանի անգամ քննարկել է վրաց պաշտոնակից Ուչա Նանուաշվիլիի հետ։
Վրացական կողմը խոստացել է իր իրավասության շրջանակում ձեռնարկել բոլոր անհրաժեշտ միջոցները։
Մարդու իրավունքների պաշտպանի աշխատակազմը նաև հայտնում է, որ միջադեպի մասնակիցների՝ Հայաստանում գտնվող ազգականները կարող են դիմել պաշտպանի աշխատակազմ իրենց հարազատների մասին տեղեկություններ ճշգրտելու նպատակով:
Հիշեցնենք, սեպտեմբերի 30-ի առավոտյան Ջավախքի Գումբուրդո գյուղի հայազգի բնակիչները փորձել էին խաչքար տեղադրել 10-րդ դարի եկեղեցու բակում, բայց իշխանությունները թույլ չէին տվել, որի արդյունքում բախում էր տեղի ունեցել ոստիկանների և գյուղացիների միջև: Գյուղ էր բերվել Վրաստանի ոստիկանության հատուկ նշանակության գումարտակը, դեպքի վայր էր ժամանել Վրաստանի ներքին գործերի նախարար Գեորգի Մգեբրիշվիլին։
