ԵՐԵՎԱՆ, 3 հոկտեմբերի — Sputnik. ԱԺ –ն այսօր 90 րոպե շարունակ քննարկեց, բայց չքվեարկեց «Ելք» խմբակցության ներկայացրած ԵԱՏՄ-ին Հայաստանի անդամակցությունը դադարեցնելու մասին նախագծի վերաբերյալ եզրակացություն ներկայացնելու նպատակով ԱԺ ժամանակավոր հանձնաժողով ստեղծելու նախագիծը։
Հիմնական զեկուցող, «Ելք» խմբակցության ղեկավար Նիկոլ Փաշինյանը ներկայացրեց Հայաստանից մրգի արտահանման պաշտոնական վիճակագրությունը, որի համաձայն 2013 թ.–ի առաջին կիսամյակում արտահանվել է 11464 տ, 2016 թ.–ի առաջին կիսամյակում` 6922 տ, իսկ 2017 թ.–ին` 2253։
«Այսինքն` 2013 թ.–ի համեմատ 9000 տոննայով նվազել է ձեր կողմից այդքան թմբկահարվող դեղձի և այլ մրգերի արտահանումը»,– ասաց Փաշինյանը։
ԱԺ փոխխոսնակ Էդուարդ Շարմազանովն իր ելույթում «ԵԼՔ» խմբակցության առաջադրած նախագիծն արհեստական որակեց։ Նրա խոսքով՝ այդ հարցի շուրջ հասարակական կարծիքը ձևավորվել է, և կնիքն էլ դրվել է ապրիլի 2-ի ընտրություններում։
«Խորհրդարանում ներկայացված 4 քաղաքական ուժերից առնվազն 3-ը կողմ են արտահայտվել ԵԱՏՄ-ին Հայաստանի անդամակցությանը։ «Ելք» դաշինքն էլ չեմ հիշում, որ այդ ընտրությունների ժամանակ բացահայտ խոսել է ԵԱՏՄ-ից դուրս գալու մասին»,– ասաց Շարմազանովը։
Ինչ վերաբերում է տնտեսական հակափաստարկներին, ԱԺ փոխխոսնակը հայտարարեց, որ ԵԱՏՄ–ին անդամակցելուց հետո հայաստանյան արդյունաբերողների համար գազի գինը նվազել է 30 դոլարով, որից ՀՀ արդյունաբերության օգուտն ավելի մեծ է, քան կարող էր առաջանալ ԵՄ հետ ազատ առևտրի համաձայնագիրը կնքելու դեպքում։
Նախագծի քննարկման ընթացքում դրան կողմ արտահայտվեցին միայն այն ներկայացրած «Ելք» խմբակցության անդամները, ՀՀԿ–ն, ՀՅԴ–ն և «Ծառուկյան» դաշինքը հայտարարեցին, որ դեմ են քվեարկելու նախագծին։
Այն քվեարկության կդրվի ԱԺ վաղվա հոկտեմբերի 4-ին նիստում։
