ԵՐԵՎԱՆ, 2 հոկտեմբերի — Sputnik. ՀՀ հատուկ քննչական ծառայությունում քննվող քրեական գործով կաշառքի մեղադրանք է առաջադրվել մեկ այլ գործով քննություն իրականացնող քննիչին ու մեղադրյալի փաստաբանին։
Ինչպես հայտնում է Հատուկ քննչական ծառայությունը, Էրեբունի և Նուբարաշեն վարչական շրջանների քննչական բաժնում քննվող քրեական գործով քննիչ Միքայել Զադոյանը ծանր մարմնական վնասվածքներ հասցնելու փաստով բերման ենթարկված Սոս Գասպարյանին չձերբակալելու դիմաց նրա հորից համաձայնել է կաշառք ընդունել։
Մեղադրյալի հայրը`Բաբկեն Գասպարյանն այցելել է հիշյալ քննչական բաժին, Զադոյանին առաջարկել 3000 ԱՄՆ դոլար` իր որդուն չձերբակալելու և նրան առավել մեղմ քրեական պատասխանատվության ենթարկելու համար:
Քննիչն ընդունել է կաշառք ստանալու առաջարկը և մեղադրյալի հորն ուղարկել ՀՀ փաստաբանների պալատի փաստաբան Գայանե Գալոյանի մոտ` նախապես այդ մասին զգուշացնելով փաստաբանին:
Փաստաբան Գալոյանը ստացել և Զադոյանին է փոխանցել 3000 ԱՄՆ դոլար կաշառքը:
Փաստաբանն ու քննիչը կալանավորված են, նախաքննությունը շարունակվում է:
Հիշեցնենք` ինչպես Sputnik Արմենիային հայտնել էր Գայանե Գալոյանի փաստաբան Մնացական Ղազարյանը, Գալոյանն իրեն առաջադրված մեղադրանքը չի ընդունում։
