ԵՐԵՎԱՆ, 2 հոկտեմբերի — Sputnik. Շոումեն, ռադիոհաղորդավար, ճանապարհորդ–բլոգեր Իվան Կռիլովը Տյումենից «Կուլտուրիցա» (առաջին միջազգային բլոգեր–քվեսթ) նախագծի շրջանակներում Հայաստանում չորս օր անցկացրեց։
Երկրի առանձնահատկությունների մասին նա պատմել է իր հետևորդներին Instagram–ի իր էջում։
Բլոգերը պատմել է իր դիտարկումների մասին. ավտոմեքենաների 99%–ը գազով է։
«Նույնիսկ, եթե դուք հրաշալի սև Գելենթվագեն հանդիպեք, ապա, հավանաբար, նաև այն գազով կլինի։ Ընդունեք դա»,– գրել է նա։
Հայաստանը մինչ օրս բոլորի համար մնում է մի երկիր, որտեղ սպիտակ «Նիվան» առանձնահատուկ տեղ է զբաղեցնում։ Բլոգերը նկատում է, որ խորհրդային ամենագնացները մեր երկրում «պարտադիր սև սկավառակներով են և մգացված ապակիներով»։
Հայերը պոլիգլոտներ են։ Բնակչության 90%-ն առնվազն երեք լեզու գիտի։ Քաղաքացիների կեսը` չորս լեզու։ Այլ կերպ լինել չի կարող։ Լավ աշխատանք ես ուզում՝ լեզու սովորիր, շատ լավ աշխատանք ես ուզում` արտասովոր լեզուներ սովորիր։ Այստեղ ես, իհարկե, մի փոքր տխրեցի, իմ ունակությունների պատճառով…
Շախմատը պարտադիր դպրոցական առարկա է։ Այդ առարկայից քննություն են հանձնում։ Չգիտեմ ինչ հարցեր են տալիս շախմատից միասնական քննությունները հանձնելիս… «Լեգալի մատ»։ «Պատմեք Բոտվիննիկի պարտիան»։ Մի խոսքով՝ հզոր է։
Հայկական գինի։ Ինձ համար մեծ բացահայտում էր դրա գոյությունը։ Պարզվեց՝ ոչինչով չի զիջում հայտնի վրացականին։
Շորտ. նույնիսկ ամենաշոգ եղանակին իրեն հարգող հայը շորտ չի կրի։
Ծով գնալիս կկրես նման բաներ, իսկ այստեղ լուրջ մարդիկ են։ Խիստ է», – մտորում է Իվանը։
Հատկապես հետաքրքրական է նրա տեսակետը Հայաստանի երկրորդ քաղաքի` Գյումրու վերաբերյալ։
«Գյումրի. մշակութային մայրաքաղաք, Հայաստանի՝ մեծությամբ երկրորդ քաղաք և, ինչպես հաճախ լինում է, «առանձին պետություն»… Հայկական հումորի և չեմպիոնների քաղաք։ Այստեղ են ծնվել Ֆրունզիկ Մկրտչյանը և Հայաստանի օլիմպիական երեք չեմպիոններից երկուսը։
Այստեղ է տեղակայված 102-րդ ռուսական ռազմակայանը, և հենց այստեղ են պատրաստում լավագույն հայկական Alexandropol գարեջուրը (վերջին երկու կետերը որևէ կերպ իրար հետ կապ չունեն)», – գրում է Իվանը։
Նա իր ընթերցողներին նույնիսկ մի կանոն է առաջարկում, որին արժե հետևել Հայաստանի հյուսիսային մայրաքաղաք այցելելու ժամանակ։
«Մի քանի կանոն նրանց համար, ովքեր պատրաստվում են Գյումրի գնալ»։
1. Համտեսիր այն ամենը, ինչ դրված է սեղանին։
2. Մի հարցրու, թե որն է այստեղ ամենակարևոր տեսարժան վայրը, քանի որ վեճ կսկսվի, որը կարող է քաղաքացիական պատերազմի վերածվել։
Եվ 3–րդ կետը (ամենակարևորը)` երբե՛ք, ոչ մի դեպքում Երևանը մի գովաբանիր, քանի որ Գյումրին Երևանից ավելի լավն է։ Եվ, նույնիսկ, «Մայր Հայաստանի» արձանը, Երևանի ճիշտ նմանը, միևնույնն է ավելի լավն է, որովհետև Գյումրիում է կանգնեցված։ Դու կհասկանաս դրա իմաստը, երբ քեզ Մերսեդեսով, ոչ թե Պրիորայով (որով եկել ես) տուն կուղարկեն, քանի որ նույնիսկ տաքսին Գյումրիում պետք է ավելի լավը լինի, քան Երևանում»,– գրում է բլոգերը։
Կռիլով նման գրառումն անմիջապես ստացավ հետևորների արձագանքը։ Նրանք, ովքեր արդեն եղել են Հայաստանում, հաստատեցին բլոգերի խոսքեր, մյուսներն էլ խոստովանեցին, որ սրանից հետո, անպայման, կայցելեն Հայաստան, առավել ևս, որ ռուսաստանցիներն արդեն կարող են Հայաստան մեկնել ներքին անձնագրերով։
