Դիլիջանի հյուրանոցներից մեկում դելֆինների հետ լողի ծառայություններ առաջարկելու մասին Sputnik Արմենիայի հարցին ի պատասխան ՀՀ Բնապահպանության նախարարության աշխատակազմի ղեկավար Հովհաննես Հովհաննիսյանը վստահեցրեց, որ գործարքն օրինական է։
Քանի որ ներկրված կենդանիները հատուկ պայմաններում բուծված և ոչ թե բնության մեջ ծնված, մեծացած դելֆիններ են, որոնց տեղափոխման համար անհրաժեշտ է արտահանող երկրի CITES թույլտվությունը։
«Տվյալ դեպքում ՌԴ-ի CITES թույլտվությամբ կենդանիներն արտահանվել են և ներկրվել Հայաստան»,- ասաց Հովհաննիսյանը։
«Մենք միայն նայում ենք, եթե նրա CITES-ն առկա է, մենք անելիք չունենք, իրավական մասով, եթե նորմալ է, թույլատրվում է մուտքը ՀՀ»,- նշեց մեր զրուցակիցը։
Ի դեպ, միջազգային կարգի համաձայն, մի երկրից մյուսը տեղափոխվող կենդանիները նաև պետք է չիպավորված լինեն։ Հովհաննիսյանի խոսքով, այս պայմանը ևս պահպանվել է։
Նշենք, որ նախարարության հրապարակած CITES թույլտվության համաձայն` Հայաստան է ներկրվել 2 դելֆին։ Թույլտվության ժամկետն ավարտվում է 2018թ-ի մարտի 7-ին։
