ԵՐԵՎԱՆ, 1 հոկտեմբերի — Sputnik. ՀՀ աշխատանքի և սոցիալական հարցերի նախարարության տվյալներով վերջին տարիներին հանրապետոության բնակչության թվաքանակում տարեցների թվի ավելացման միտում է նկատվում:
Մեր երկրում 63 տարեկան և բարձր մարդկանց թիվը կազմում է մշտական բնակչության ընդհանուր թվի 12,9 տոկոսը՝ շուրջ 387 000 մարդ: Նախարարության վերջին տվյալներով՝ հանրապետությունում այսօր բնակվում է 100 տարին լրացած 85 մարդ, ամենատարեց բնակիչը 115 տարեկան է, նա Գեղարքունիքի Երանոս գյուղի բնակիչ է, իսկ Երևանում 100 և ավելի բարձր տարիքի 22 մարդ կա:
Տարեցների միջազգային օրվա կապակցությամբ մեծերին մանկության գիրկն էր հրավիրել Երևանի թիվ 78 հիմնական դպրոցը: «Տարեցները տարեցներին» խորագրով ինքնատիպ միջոցառումը նպատակ ուներ նրանց մի օր կտրել առօրյա հոգսերից ու տոն պարգևել:
Դպրոցի դահլիճում ոչ թե աշակերտներն էին, այն նրանց տատիկներն ու պապիկները, իսկ նրանց համար ելույթ էր ունենում «Հնաբնակ Երևանցիների» Ասոցիացիայի «Աշնանային ձայներ» երգչախումբը (գեղ. ղեկավար՝ Լաուրա Մակարյան, խմբավար՝ Նարինե Դավթյան):
«Աշնանային ձայները» 25-ից ավելի երգիչ-երգչուհի ունի իր կազմում: Նրանցից ամենաերիտասարդները 60 տարեկան են, իսկ երկուսն արդեն բոլորել են կյանքի 85-րդ տարին:
Բայց նպատակասլացությունն ու հետաքրքիր ապրելու ցանկությունը օգնում են նրանց չզգալ ծերունական ծանրություն: Այդ էր վկայում դպրոցում կայացած համերգը, որի ընթացքում երգչախմբի կատարումները փոթորկում էին հանդիսատես տատիկ-պապիկների հոգին. փոխադարձ հուզումն ու ապրումները երիտասարդացրել էին բոլորին:
Թիվ 78 դպրոցի տնօրեն Ա. Միրզոյանը շնորհակալագիր հանձնեց երգչախմբին, բարեմաղթանքներ ուղղեց բոլոր հյուրերին, ովքեր թիկունքում տասնամյակներ թողած, աշխատանքային հարուստ կենսագրություն ունեցող մարդիկ են:
Իսկ վերջում «Հե՜յ, ջա՜ն, Երևան» երգի ժամանակ երգելու ցանկություն ծնվեց նաև հանդիսատես ծերերի մոտ, և նրանք բոլորով երգեցին իրենց սիրելի քաղաքին նվիրված երգը:
