ԵՐԵՎԱՆ, 1 հոկտեմբերի — Sputnik. Ռուսաստանի ԱԳՆ-ն կառավարություն առաջարկ է ներկայացրել` Ռուսաստանում աշխատելու համար ճանաչել հայկական ազգային վարորդական իրավունքները, Sputnik Արմենիային հայտին ի պատասխան հայտնել են ԱԳՆ-ի մամուլի ծառայությունից:
Հիշեցնենք, որ 2017 թվականի հունիսի 1-ից այլ երկրների վարորդական իրավունք ունեցող քաղաքացիներն այլևս իրավունք չունեն Ռուսաստանում պրոֆեսիոնալ վարորդ աշխատել։ Այս օրենքը տարածվում է նաև հայկական վարորդական իրավունք ունեցող անձանց վրա: ԵԱՏՄ երկրների տված վարորդական վկայականների փոխադարձ ճանաչման հարցը քննարկվել է Եվրասիական միջկառավարական խորհրդի նիստին, որը տեղի է ունեցել Աստանայում, օգոստոսի 14-ին։ Ռուսաստանի ԱԳՆ և Հայաստանի ոստիկանությունը խորհրդատվություններ են անցկացրել երկու երկրների տարածքում տրված ազգային կամ միջազգային վարորդական վկայակաների փոխադարձ ճանաչման մասին։
Կողմերը հավանության են արժանացրել երկու երկրների օրենսդրության մեջ փոփոխություններ մտցնելու առաջարկին, ինչը թույլ կտա Ռուսաստանի տարածքում գործարար կամ այլ գործունեություն իրականացնելիս օգտագործել Հայաստանի ազգային վարորդական իրավունքները և հակառակը:
«Այդ նպատակով Ռուսաստանի ԱԳՆ-ն առաջարկ է ներկայացրել համապատասխան փոփոխություններ կատարել 1995 թվականի դեկտեմբերի 10-ին ընդունված «Ճանապարհային երթևեկության անվտանգության մասին» № 196-ФЗ դաշնային օրենքի 25-րդ հոդվածի 13-րդ կետում, որն ուղարկվել է համաձայնեցման ՌԴ կառավարություն», — գրված է հաղորդագրության մեջ:
ԵՏՀ-ի մամուլի ծառայությունում Sputnik Արմենիային պարզաբանեցին, որ օրինագիծ է նախապատրաստվել, որը վարորդական վկայակաների փոխադարձ ճանաչում է նախատեսում:
Մոտ ապագայում նախատեսվում է այն համաձայնեցնել բոլոր իրավասու մարմինների հետ: Ընդ որում` հստակ ժամկետներ դեռ չկան:
Օրենքն ընդունվել է Ռուսաստանի ճանապարհներին օտարերկրյա քաղաքացիների մասնակցությամբ ՃՏՊ-ների թվի աճի հետ կապված։ Օրենքի խախտման ու առանց ռուսական վարորդական վկայականների անձանց տրանսպորտային միջոցների վարելու իրավունք տրամադրելու համար պաշտոնյաները կտուգանվեն 50 հազար ռուբլով։
