ԵՐԵՎԱՆ, 31 օգոստոսի — Sputnik. Ռուսաստանում հայկական վարորդական իրավունքի վկայականների հարցով ռուսական կողմի հետ համաձայնություն է ձեռք բերվել: Sputnik Արմենիային այս մասին ասաց ՀՀ վարչապետի մամուլի խոսնակ Արամ Արարատյանը:
Նա հայտնել է, որ օգոստոսի 18-ին Մոսկվայում կազմակերպվել է խորհրդակցություն, որին մասնակցել են ՀՀ ոստիկանության պետի տեղակալ Վարդան Եղիազարյանը և ՌԴ ներքին գործերի նախարարի առաջին տեղակալ Ալեքսանդր Գորովոյը:
«Քննարկումների արդյունքում կողմերը համաձայնել են, որ հնարավորինս սեղմ ժամկետներում անհրաժեշտ է համապատասխան փոփոխություններ կատարել Ռուսաստանի Դաշնության և Հայաստանի Հանրապետության օրենսդրություններում, որոնք վերաբերում են խնդրո առարկային»,- նշեց Արարատյանը:
Հիշեցնենք, որ 2017 թվականի հունիսի մեկից այլ երկրների վարորդական իրավունք ունեցող քաղաքացիներն այլևս իրավունք չունեն Ռուսաստանում պրոֆեսիոնալ վարորդ աշխատել։
Օրենքն ընդունվել է Ռուսաստանի ճանապարհներին օտարերկրյա քաղաքացիների մասնակցությամբ ՃՏՊ-ների թվի աճի հետ կապված։ Օրենքի խախտման ու առանց ռուսական վարորդական վկայականների անձանց տրանսպորտային միջոցների վարելու իրավունք տրամադրելու համար պաշտոնյաները կտուգանվեն 50 հազար ռուբլով։
ԵԱՏՄ երկրների տված վարորդական վկայականների փոխադարձ ճանաչման հարցը քննարկվել է Եվրասիական միջկառավարական խորհրդի նիստին, որը տեղի է ունեցել Աստանայում օգոստոսի 14-ին։
Հայաստանի ու Ռուսաստանի վարչապետները հանձնարարել են կառավարություններին մինչ 2017 թվականի օգոստոսի 20-ը խորհրդատվություններ անցկացնել երկու երկրների տարածքում տրված ազգային կամ միջազգային վարորդական վկայակաների փոխադարձ ճանաչման մասին։
