Արմենուհի Մխոյան, Sputnik.
Իր հրաշալի ձայնով սոցիալական ցանցերում հայտնի դարձած Խորենը, որի մասին Sputnik Արմենիան արդեն պատմել է, երկարատև բաժանումից հետո գտել է ծնողներին և արդեն Հայաստան է այցելել՝ հանդիպելու ծնողներին, որոնք 25 տարի առաջ նրան մանկատուն էին հանձնել: Խորենն այս ընթացքում ծանոթացել է ոչ միայն ծնողների, քրոջ ու եղբոր հետ, այլ նաև բոլոր բարեկամների:
Գյումրու մանկատան նախկին սանը, որն այժմ սովորում է Կրակովի Պապական համալսարանում, համացանցի օգնությամբ գտել է ծնողներին: Պարզել է, որ նրանք ապրում են Երևանում: Թեև 25 տարի ծնողական գուրգուրանք չտեսած տղայի համար 10 օր ծնողերի հետ անցկացնելը բավական կարճ ժամանակահատված է, բայց Խորենն այս անգամ Կրակով է վերադառնում` արդեն անհամբեր սպասելով հայաստանյան հաջորդ այցին:
«Ամեն ինչ շատ լավ է։ Բոլոր բարեկամներին այցելեցինք, ուրախացանք: Ընտանիքով գնացինք Մայր Աթոռ Սուրբ Էջմիածին, մոմ վառեցինք: Կարոտս չեմ առել, այս անգամ արդեն Հայաստանից չեմ ուզում գնալ, բայց պետք է»,- ասաց Խորենը։
Նա այժմ ավելի հաճախ կձգտի Հայաստան գալ, տեսնել ծնողներին: Խորենը Sputnik Արմենիայի թղթակցին հավաստիացրեց, որ պետք չէ և չի ուզում խոսել անցյալի մասին. կարևորն հիմա դա չէ, հատկապես, երբ ինքն ամեն ինչ հասկանալով` ներել է ծնողների՝ իրեն մանկատուն հանձնելու քայլը:
Խորենն անկեղծացավ՝ 2 տարով փոքր եղբայրն արտաքինով շատ նման է նրան, իսկ երգելը, պարզվում է, հայրական կողմից է ժառանգել, թեև ո՛չ քույրը, ո՛չ էլ եղբայրը չեն երգում:
«Շատ ուրախ եմ, որ հանդիպեցի, բայց արդեն տխուր եմ, որ մեկնելու եմ: Թող Աստված նրանց առողջություն տա։ Իսկ ով փնտրում է, թող գտնի ծնողին, ով գտել է, թող ների: Եղածն անցած է»,- ասաց Խորենը:
Նա Կրակով է մեկնելու ուսումը շարունակելու նպատակով։ Մեկնելու է ստիպված, բայց սիրով, կարոտով ու նոր հանդիպման սպասումով:
Խորենին Գյումրիում բոլորը գիտեն: Մինչև 12 տարեկան դառնալն ապրել է Գյումրու «Երեխաների տուն» մանկատանը, ապա տեղափոխվել է «Նանսենի անվան երեխանեի խնամքի կենտրոն»: Սովորել է Գյումրու թիվ 30 դպրոցում: Ֆ.Նանսենի անվան Գյումրու գիշերօթիկ տեղափոխվելուց հետո Խորենը ուսումը շարունակել է քաղաքի թիվ 4 դպրոցում, ավարտել է Գյումրու Կարա Մուրզայի անվան պետական երաժշտական քոլեջը:
Մեկ տարի առաջ Խորենը Լեհաստան էր գնացել, բայց ոչ ուսման համար: 2016թ-ի ամռանը տղան հիվանդացել էր թոքաբորբով, որոշ ժամանակ բուժվել Գյումրիում, ապա՝ Երևանում, իսկ 3 ամիս անց՝ հեռացել երկրից: Հրավիրող կողմը՝ «Մայա Բրանթ» բարեգործական հիմնադրամը, Խորենին Լեհաստանում ապահովել է բնակարանով, հոգում է ծախսերը, վճարում ուսման վարձը: Թեև Կրակովում Խորենը լրագրություն է սովորում, բայց նրա տարերքը երգն է, ու հենց համացանցում հրապարակած երգերի շնորհիվ էլ շատերը ճանաչեցին տաղանդավոր երիտասարդին:
