ԵՐԵՎԱՆ, 29 սեպտեմբերի — Sputnik, Լաուրա Սարգսյան. Տավուշի մարզի Արծվաբերդ գյուղի և այլ հարակից գյուղերի բնակիչներին կսկսեն պատվաստել հոկտեմբերի 2-ից։ Ներկա պահին գրանցված կամ հիվանդանոց տեղափոխված հիվանդներ չկան։ Այս մասին Sputnik Արմենիայի թղթակցին ասաց ՀՀ առողջապահության Պետական հակահամաճարակային հիգիենիկ գերատեսչության մասնագետ Լիանա Թորոսյանը։
«Պատվաստումն իրականացվում է վարակի հետագա տարածումը կանխելու համար։ Տուլարեմիան առավել վտանգավոր տեսակի վարակների դասին է պատկանում, և նրա ախտանշանները շատ նման են մրսածության և սուր շնչառական վիրուսային ինֆեկցիաների ախտանշաններին», – ասել է Թորոսյանը։
Բժիշկն ավելացրել է, որ թեև տուլարեմիան ուղեկցվում է ջերմությամբ, մկանային թուլությամբ, այսինքն` բոլոր ախտանշաններով հիշեցնում է գրիպը, այնուամենայնիվ, տարբերություն կա. հիվանդությունն ուղեկցվում է գեղձերի այտուցվածությամբ, ատիպիկ անգինայով, երբեմն նաև թոքաբորբ է զարգանում:
Նրա խոսքով` վարակը տեղայնացվել է և տարածվել միայն Արծվաբերդ գյուղում։ Տուլարեմիայով կարող էին վարակված լինել կրծողները, որոնց դիակները մնացել են գյուղացիների կողմից մշակվող դաշտերում։ Տեղի բնակիչները կարող էին կամ վարակվել տզերի և լվերի խայթոցներից, կամ տուլարեմիայի մանրէներ պարունակող օդ ու փոշի շնչելուց։ Վարակը չի փոխանցվում օդակաթիլային ճանապարհով։
Թորոսյանն ընդգծել է, որ վարակի օջախը տեղայնացվել է։ Ինկուբացիոն շրջանը տևում է մեկից երեք շաբաթ։ Հիվանդները կարող են բուժում անցնել ինչպես ամբուլատոր, այնպես էլ հիվանդանոցային պայմաններում։ Ավելի վաղ գրանցված 25 դեպքերը միջին և թեթև ծանրության էին։
Նույն գյուղում տուլարեմիայի դեպքեր էին գրանցվել նաև օգոստոսին։ Տուլարեմիան բնական օջախային հիվանդություն է, որը տարածված է հիմնականում մեղմ կլիմայական գոտիներում: Տուլարեմիայի հիմնական աղբյուր են հանդիսանում կրծողները՝ մկները, ջրային առնետները,դաշտային մկները, նապաստակները։
