ԵՐԵՎԱՆ, 28 սեպտեմբերի — Sputnik. Հեղինակավոր Forbes ամսագիրը կազմել է Ռուսաստանի ամենախոշոր մասնավոր ընկերությունների այս տարվա ցանկը, որում ներառվել են նաև հայկական ծագում ունեցող գործարարների կազմակերպությունները։
Վարկանիշային ցուցակի երկրորդ տեղում է Սերգեյ Գալիցինի (Հարությունյան) «Մագնիտ» մանրածախ վաճառքով զբաղվող ցանցը, որի եկամուտն անցած տարի կազմել է 1 տրիլիոն 75 միլիարդ ռուբլի։ Աշխատակիցների քանակը հասել է 270 հազարի։
Սամվել Կարապետյանի գլխավորած «Տաշիր» ընկերությունների խումբը 34-րդ տեղում է։ Ընկերության տարեկան եկամուտը կազմում է 195 միլիարդ ռուբլի։ «Տաշիրում» 45 հազար մարդ է աշխատում։
«Գրուպա РЕСО ապահովագրական ընկերությունը, որը պատկանում է Սերգեյ ու Նիկոլայ Սարկիսով եղբայրներին, հայտնվել է վարկանիշային աղյուսակի 92-րդ տեղում։ Նրանց եկամուտն անցած տարի կազմել է 87 միլիարդ 4 միլիոն ռուբլի։ Ընկերությունը 7 հազար 721 աշխատակից ունի։
Forbes-ի ցուցակում կան ութ ընկերություն, որոնց սեփականատերերը հայկական ծագում ունեն։
