ԵՐԵՎԱՆ, 28 սեպտեմբերի — Sputnik. ՀՀ կառավարության գերակայություններից մեկը կոռուպցիայի դեմ պայքարն է, որի հիմնական երաշխիքը հակակոռուպցիոն ռազմավարության արդյունավետ իրականացումն է։ Այսօր ամփոփիչ ասուլիսում նշեց Արդարադատության նախարար Դավիթ Հարությունյանը` թվարկելով նաև անցնող 1 տարվա ընթացքում իրականացված իրավական բարեփոխումները։
Դրանք, սակայն, առայժմ արդյունք չեն տալիս։ Արվածի պտուղները տեսանելի կլինեն 2-3 տարի հետո։
«Եթե 2-3 տարի հետո դուք հայտնաբերեք, որ որևէ պետական պաշտոնյա փոխանցում է արել իր հորեղբոր տղային և ստացել է այդ փոխառությունը, կարող եք այդ գործարքը դիտարկել ապօրինի, եթե այն իրականացվել է կանխիկ եղանակով։ Իսկ դա առաջացնելու է արդեն երկրորդ պատասխանատվությունը, որը կոչվում է ապօրինի հարստացում, որովհետև այդ գումարները չեն կարող դիտվել օրինական»,– ասաց Հարությունյանը` խոստանալով, որ այսօր ներդրված և դեռևս արդյունք չտվող մեթոդները ժամանակի ընթացքում սկսելու են շատ կոշտ աշխատել։
Լրագրողների հարցին, թե որքանով է կառավարությունը հետևողական կոռուպցիայի դեմ հայտարարված պայքարին, եթե 12 տարվա ազատազրկման դատապարտված կոռուպցիոներ պաշտոնյան (Սոցիալական ծառայության նախկին պետ Վազգեն Խաչիկյանը) 2-3 տարի անց ազատ է արձակվում, Դավիթ Հարությունյանը պատասխանեց. «Յուրաքանչյուր անձ ներում հայցելու իրավունք ունի»։ «Եթե ձեր հարցը վերաբերում է նրան, թե արդյո՞ք կարելի է ներման իրավունքով իրականացնել քաղաքականություն` բացասական առումով, իհարկե, հնարավոր է, բայց ես չեմ կարծում, որ նման քաղաքականություն մեզանում իրականացվում է»,– ասաց նախարարը։
Ներում շնորհելուց, Դավիթ Հարությունյանի մեկնաբանմամբ, վերլուծվում են բազմաթիվ գործոններ։
