ԵՐԵՎԱՆ, 28 սեպտեմբերի — Sputnik. Այսօր ազատ է արձակվել Վանաձորի ՔԿՀ-ում իր պատիժը կրող Սոցիալական ապահովության պետական ծառայության նախկին պետ Վազգեն Խաչիկյանը: Այս լուրը Sputnik Արմենիայի հետ զրույցում հաստատեց քրեակատարողական վարչության հանրային կապերի բաժնի պետ Գոռ Ղլեչյանը` հավելելով, որ Խաչիկյանն ազատ է արձակվել պատժի լրիվ կրումով:
ՀՀ արդարադատության նախարար Դավիթ Հարությունյանը լրագրողների հետ հանդիպման ժամանակ անդրադառնալով Վազգեն Խաչիկյանի ազատ արձակմանը` հաստատեց, որ Խաչիկյանին ներում է շնորհել Սերժ Սարգսյանը, և հավելեց, որ այդ մասին տեղեկացել է կառավարությունում լրագրողներից։
Թե ինչ իրավական հիմքով են ազատ արձակվել Խաչիկյանն ու նրա հետ դատապարտված այլ անձինք, Դավիթ Հարությունյանը չհստակեցրեց` ասելով, որ տեղյակ չէ, բայց նշեց, որ «ներում շնորհելու բացառիկ իրավունքը ՀՀ-ում պատկանում է երկրի նախագահին»։
Լրագրողների պնդմանը, թե ՔԿՀ-ն հայտարարում է, որ Խաչիկյանն ու նրա հանցակիցներն ազատ են արձակվել «պատժի լրիվ կրումով», մինչդեռ 3 տարի առաջ էին դատապարտվել 12 տարի ժամկետով, արդարադատության նախարարն արձագանքեց. «Ներման ակտը կարող է լինել բազմապիսի, օրինակ պատժի կրման ժամկետը փոխարինել այսինչ ժամկետով կամ նվազեցնել ազատազրկման ժամանակահատվածը»։
«Եթե որոշում է կայացվել նվազեցնել պատժի կրման ժամանակահատվածը, ապա անձի պատիժն արդեն համարվում է նվազեցված։ Ես ենթադրում եմ, որ խոսքը վերաբերում է այդ դեպքին»,- ասաց Դավիթ Հարությունյանը։
Ի դեպ, Վազգեն Խաչիկյանի և մյուսների գործով բոլոր դատապարտվածներն արդեն ազատ են արձակվել։
Հիշեցնենք, որ Վազգեն Խաչիկյանը 2014 թվականի դեկտեմբերի 8-ին դատապարտվել է 12 տարվա ազատազրկման՝ 261 միլիոն ՀՀ դրամ գույքի բռնագրավմամբ։ Վազգեն Խաչիկյանին և Սոցիալական ապահովության պետական ծառայության մի շարք աշխատակիցների մեղադրանք էր առաջադրվել, որ վերջիններս 2006–2010թթ. ընկած ժամանակահատվածում, օգտագործելով իրենց պաշտոնեական դիրքը, կենսաթոշակի կասեցված վճարումը վերսկսելու վերաբերյալ վճարման իրավունք վերապահող կեղծ դիմումներ պատրաստելով կամ առանց այդ դիմումների վճարային ցուցակներում կենսաթոշակառուների ստորագրությունները կեղծելու միջոցով անհիմն ելքագրել և յուրացման եղանակով հափշտակել են իրենց վստահությանը հանձնված, մահացած կամ ՀՀ տարածքից բացակայող կենսաթոշակառուների թոշակները։
Ըստ մեղադրանքի՝ Վազգեն Խաչիկյանը խարդախությամբ հափշտակել է պետական բյուջե վերականգնման ենթակա, առանձնապես խոշոր չափերի` 29 միլիոն ՀՀ դրամ գումար:
