ԵՐԵՎԱՆ, 27 սեպտեմբերի — Sputnik. Քրդստանի հայերը շահագրգռված են, որ անկախանան, քանի որ այդ դեպքում հայերենը պետական լեզու կդառնա, Sputnik Արմենիա մամուլի կենտրոնում հայտնեց թուրք-քրդական հարաբերությունների փորձագետ Կարեն Հովհաննիսյանը։
Ըստ նրա` հենց այդ պատճառով է տեղի հայ համայնքը քվեարկել Քրդստանի անկախացման օգտին։
Հովհաննիսյանը համոզված է, որ Քրդստանի անկախությունը կհռչակվի Նովրուզի օրը` 2018 թվականի մարտի 21-ին։
«Շատերը կասկածում էին, որ հանրաքվեն կկայանա, բայց այն անցավ հանգիստ ու խաղաղ մթնոլորտում», — ասաց Հովհաննիսյանը։
Սակայն, նրա խոսքով, Քրդստանի անկախությունը կապված է ԱՄՆ-ի հետ։ Քրդստանի տարածքում ԱՄՆ-ի 5 ռազմակայան է տեղակայված, որից մեկն Իրանից ընդամենը 115 կմ է հեռու։ Եթե Թուրքիան, Իրանն ու Իրաքն իրենց «լավ պահեն», ապա Քրդստանի անկախության հռչակումը կարող է հետաձգվել։
Փորձագետը դրական է գնահատում քուրդ ժողովրդի ինքնորոշման հանրաքվեի ընթացքն ու արդյունքները։
«Հանրաքվեն անցավ առանց ռազմական ու քաղաքական բախումների, ինչի հույս ուներ Թուրքիան։ Իրանը նույնպես ուժեր է կենտրոնացրել Քրդստանի սահմանին, որպեսզի իրեն պաշտպանի ռազմական բախման դեպքում», — ասաց Հովհաննիսյանը։
Թուրքիան էլ իր հաշիվներն ունի Քրդստանի հետ, առաջին հերթին Թուրքիան այնտեղից նավթ է արդյունահանում, հետո էլ Անկարան ԱՄՆ ռազմակայանների դեմ դուրս չի գա։
Իրաքի Քրդստանի անկախության մասին հանրաքվեն տեղի է ունեցել 2017 թվականի սեպտեմբերի 25-ին։
Հանրաքվեից հետո Իրան ու Թուրքիան լայնածավալ զորավարժություններ են սկսել։ Ավելին` Թուրքիայի նախագահը սպառնացել է ռազմական ինտերվենցիայով` հայտարարելով, որ Անկարան քրդական պետությունը չի ընդունում։ Իրանը կոչ էր անում Էրբիլին չեղարկել հանրաքվեն` հայտարարելով, որ այն կարող է ապակայունացնել տարածաշրջանը։ Հանրաքվեն խիստ քննադատության են ենթարկել համաշխարհային ու տարածաշրջանային գրեթե բոլոր տերությունները։
