ԵՐԵՎԱՆ, 26 սեպտեմբերի — Sputnik, Խաչիկ Չախոյան. Հերթական պարտիայում հայ շախմատիստն ուներ դիրքային առավելություն, բայց չկարողացավ այն օգտագործել ու հաղթանակը ձեռքից բաց թողեց: Վաղը շախմատիստներն արդեն կմրցեն արագ շախմատում:
Տեղին է նշել, որ այս մրցամարտում եզրափակչի մասնակիցները առաջին անգամը չէ, որ խաղալու են «թայ բրեքում»: Մրցումների երկրորդ փուլում Արոնյանը միայն կայծակնային շախմատում կարողացավ հաղթահարել կանանց աշխարհի քառակի չեմպիոն Հու Յուֆանի արգելքը, իսկ Լիրեն Դինգը այդ հատվածում արագ շախմատում հաղթեց ուկրաինացի Մարտին Կրավցիվին:
Երրորդ փուլում Արոնյանը նորից միայն կայծակնային շախմատում հաղթանակի հասավ, այս դեպքում արդեն ռուս Մաքսիմ Մատլակովի նկատմամբ: Չինացին էլ արագ շախմատում պարտության մատնեց հնդիկ Վիդի Գուժրաթիին: Կիսաեզրափակիչում էլ Արոնյանը «մահվան» պարտիայում հաղթանակի հասավ Մաքսիմ Վաշյե Լագրավի նկատմամբ, իսկ Դինգը կայծակնային շախմատում պարտության մատնեց Ուեսլի Սոյին:
Ստացվում է, որ մրցակիցներն արագ շախմատում էլ լիարժեք հակառակորդներ են: Համաշխարհային դասակարգային ցուցակում, արագ շախմատում Արոնյանի գործակիցը մի փոքր բարձր է Դինգից, իսկ կայծակնային շախմատում հակառակն է` չինացին ավելի շատ հաղթանակներ ունի:
