ԵՐԵՎԱՆ, 26 սեպտեմբերի — Sputnik. Հոկտեմբերի առաջին տասնօրյակում շահագործման կհանձնվեն «Հյուսիս-հարավ» ավտոճանապարհի Երևան-Աշտարակ, Երևան-Արտաշատ հատվածների 3 կամուրջը, մնացած 4-ի վրա դեռ լրացուցիչ աշխատանքներ են անհրաժեշտ, որոնք նախագծով նախատեսված չէին: Այսօր` սեպտեմբերի 26-ին, լրագրողներին հայտնեց ՀՀ տրանսպորտի, կապի և տեղեկատվական տեխնոլոգիաների նախարար Վահան Մարտիրոսյանը։
Թե որքան կարժենա ճանապարհի ամբողջ շինարարությունը, նախարար Մարտիրոսյանը հրաժարվեց նշել` ասելով, որ նախագծային հաշվարկները վերջնականապես ավարտված չեն։ Իսկ ինչ վերաբերում է ճանապարհի որոշ հատվածների շինարարության արժեքի կտրուկ բարձրացմանը, Մարտիրոսյանն այն արդարացված է համարում։
«Գինը կապված է օբյեկտիվ պատճառների հետ,- ասաց նա,- Աշտարակ-Լանջիկ հատվածը, որի կառուցումը ֆինանսավորում են ԱԶԲ-ն և Եվրոպական ներդրումային բանկը, հարթավայրային չէ, այդ իսկ պատճառով էլ այնտեղ ինքնարժեքը բարձրացել է՝ կապված հողային աշխատանքների հետ: Վստահ եմ, որ Հայաստանին պետք է այս ճանապարհը, Հյուսիս-հարավից կախված է և՛ զբոսաշրջային, և՛ բեռնափոխադրումների հոսքը, ինչը, վստահ ենք, կավելանա, կակտիվանա նաև բիզնեսը»:
Հիշեցնենք` Ասիական զարգացման բանկի հայաստանյան ներկայացուցչության գրասենյակի տնօրեն Շեյն Ռոզենթալը հայտարարել էր, որ «Հյուսիս-հարավ» ավտոճանապարհի Աշտարակ-Լանջիկ հատվածի մեկ կիլոմետրի կառուցման արժեքը նախկին 1,2 մլն դոլարի փոխարեն գնահատվել է 3,5 մլն դոլար։ Ռոզենթալը նաև կասկած էր հայտնել, թե այդ նախագիծն ավարտին կհասնի։
«ՀՀ կառավարությունը մտադիր է ավարտին հասցնել այս ծրագիրը»,- ասաց նախարարը։
Վահան Մարտիրոսյանը հայտնեց նաև, որ ճանապարհի մյուս հատվածների շինարարության հարցը կառավարությունը քննարկում է մասնավոր հատվածի և այլ բանկերի հետ ևս։
Նշենք, որ «Հյուսիս-Հարավ» ճանապարհային միջանցքը Հայաստանի համար ռազմավարական նշանակություն ունի։ 550 կիլոմետր երկարությամբ այս ճանապարհը Հայաստանի ամբողջ երկայնքով ընդհանուր կապ կապահովի Իրանի և Վրաստանի հետ։
