ԵՐԵՎԱՆ, 26 սեպտեմբերի — Sputnik. Մինչև տարեվերջ ԵԱՏՄ երկրներում սիգարետների բոլոր տուփերի վրա վնասակարության մասին նախազգուշացնող նշաններ կզետեղվեն։ Ռուսաստանի և Հայաստանի առողջապահության նախարարության փորձագետների մշակած էսքիզները ԵԱՏՄ հատուկ հանձնաժողովը հաստատել է 2016 թվականի մարտին։ Այս մասին ՌԴ առողջապահության նախարար Վերոնիկա Սկվորցովան հայտնեց հայ-ռուսական առողջապահական երրորդ համաժողովի բացման ժամանակ։
«Մաքսային միության շրջանակում Հայաստանի գործընկերների հետ մասնակցում ենք ծխախոտի ոլորտում տեխնիկական կարգավորման վերաբերյալ նորմատիվային ակտերի մշակմանը։ Այս տարի ծխելու վնասակարության մասին նախազգուշացնող նշաններ են զետեղվելու տուփերի դիմերեսին և դարձերեսին, որոնք պետք է զբաղեցնեն տուփի մակերեսի ավելի քան 50%-ը», — ասել է Սկվորցովան։
Նրա խոսքով` երկու երկրների փորձագետներն այսօր աշխատանքներ են տանում ծխախոտային արտադրանքի և դրանցից արտազատվող նյութի պարունակության մասին հաշվետվության համաձայնեցման շուրջ։ Հաշվետվությունը, որով նախատեսվում է լիովին բացահայտել ծխախոտային արտադրանքի բաղադրությունը, կներկայացվի ԵԱՏՄ անդամ-պետությունների առողջապահական մարմիններին։ Մինչ օրս հայտնի չէ, թե ծխախոտային արտադրանքն ինչ է պարունակում, ինչ քանակությամբ և ինչ վնաս է հասցնում օրգանիզմին։
«Մենք նախատեսում ենք նաև բարձրացնել ակցիզների գինը և կարծում ենք, որ դա ծխելու դեմ պայքարի ամենաարդյունավետ միջոցն է», — ասաց ռուս նախարարը։
2017 թվականի հունվարից հուլիս ընկած ժամանակահատվածում Հայաստանում ծխախոտի արտադրության ծավալները 2016 թվականի նույն ժամանակահատվածի համեմատ աճել են 24%-ով։ Ընդ որում, ծխախոտային արտադրանքի մասնաբաժինը արդյունաբերական ոլորտի 15%-ն է կազմել։
2017 թվականի տվյալով, ծխող տղամարդկանց թիվը 50% է կազմում, իսկ օրական ծխած սիգարետների քանակը` 8 գլանակ։ Այս ցուցանիշը չի փոխվել 2012 թվականից։ 2012 թվականին մեծահասակների շրջանում ծխախոտի տարածվածությունը կազմել է 25,4%, որից 50,9%-ը տղամարդիկ են, 3,2%-ը` կանայք։
ՀՀ կառավարությունը 2017 թվականի օգոստոսին հավանություն է տվել ծխելու դեմ պայքարի ռազմավարությանն ու այդ ռազմավարության շրջանակում 2017-2020 թվականների միջոցառումների ծրագրին։ Նպատակը ծխախոտի օգտագործման նվազման ուղղությամբ միջոցներ ձեռնարկելն է, ինչպես նաև բնակչության առողջության պահպանումը, ծխախոտի օգտագործման նվազեցումը (տարեկան 1,5-2%-ով), 15 և բարձր տարիքի տղամարդկանց շրջանում ծխախոտի օգտագործման գործակցի համեմատական կրճատումը մինչև 10%, երկրորդային ծխի ազդեցության նվազեցումը։
