ԵՐԵՎԱՆ, 23 սեպտեմբերի — Sputnik, Դիանա Հարությունյան. Հայաստանում որոշ փորձագետներ ու հասարակական կազմակերպություններ շտապել են հայտարարել, որ Հայաստանում ռուսերենի դասավանդման նոր հայեցակարգով ավելի է բարձրացվում ռուսերենի դերը մյուս օտար լեզուների նկատմամբ: ՀՀ ԿԳՆ Հանրակրթության վարչության պետ Աշոտ Արշակյանը Sputnik Արմենիայի հետ զրույցում մանրամասն խոսել է աղմուկ բարձրացրած հայեցակարգի մասին։
«Ի սկզբանե եղել է առհասարակ օտար լեզուների դասավանդման հայեցակարգ ունենալու կարիքը: Ու նախևառաջ ստեղծվել է օտար լեզուների դասավանդման հայեցակարգը: Ռուսերենի դասավանդումն առանձնացնելու կարիքը հետո է զգացվել»,- ասաց հանրակրթության վարչության պետը:
Արշակյանը պարզաբանեց` ռուսերենն անխտիր բոլոր հանրակրթական դպրոցներում 2-րդ դասարանից են անցնում, սա հաստատված ուսումնական պլան է ու նոր բան չէ: Երկրորդ օտար լեզուն անցնում են 3-րդ դասարանից, բայց լեզվի ընտրությունը դպրոցն է կատարում: Դպրոցները հիմնականում նախընտրում են անգլերենը, որոշ դեպքերում` գերմաներենն ու ֆրանսերենը: 5-րդ դասարանից կա նաև 3-րդ օտար լեզու ընտրելու հնարավորություն, ու էլի դպրոցն է որոշում: Նոր հայեցակարգով ոչ թե ռուսերենին հատուկ կարգավիճակ է տրվում, այլ միայն բովանդակային խնդիր է լուծվում՝ որպես մի լեզվի, որը բոլորի համար պարտադիր է:
«Նոր հայեցակարգով ռուսաց լեզվի ժամերը չեն ավելանալու և մյուսներինը չեն պակասելու: Մյուսների նկատմամբ առավելություն, որպես այսպիսին, հայեցակարգը չի տալիս, խնդիրը զուտ դասավանդման որակի բարելավումն է»,- ասաց հանրակրթության վարչության պետը:
Տեղի է ունենալու նոր հայեցակարգով ծրագրերի վերանայում, դասագրքերի փոփոխություն, ուսուցիչների վերապատրաստում: Ինչպես ասում են, զուտ բովանդակային փոփոխություն: Ի դեպ, հայեցակարգն արդեն հանրային քննարկման է դրված: Կրթության և գիտության նախարարությունում սպասում են առողջ դիտողությունների ու հետաքրքիր առաջարկների:
Գիտության և կրթության նախարար Լևոն Մկրտչյանը նախօրին հայտարարել է, որ հայեցակարգի շուրջ բաձրացած աղմուկն իրականում արհեստական է ու անհարկի քաղաքականացված:
Հայաստանի կրթության և գիտության նախարարության մշակած հայեցակարգի տեքստում էլ հստակ նշված է` Հայաստանի Հանրապետության կրթական համակարգում անհրաժեշտ է կատարել բարեփոխումներ, որոնք քաղաքացիներին հնարավորություն կտան տիրապետելու մի քանի օտար լեզուների, ինչպիսիք են ռուսերենը, մեկ կամ մի քանի եվրոպական (անգլերեն, ֆրանսերեն, գերմաներեն և այլն) և արևելյան (արաբերեն, պարսկերեն, չինարեն և այլն) լեզուներ:
