ԵՐԵՎԱՆ, 23 սեպտեմբերի — Sputnik. ՀՀ ԱԺ արտաքին հարաբերությունների մշտական հանձնաժողովի նախագահ Արմեն Աշոտյանը Բաքվում անցկացվող «Եվրանեսթ» ԽՎ համաժողովում պատմել է, թե ինչն է իրեն կապում Ադրբեջանի մայրաքաղաքի հետ։
Պատգամավորը նշել է, որ Բաքվում եղել է հեռավոր 1988 թվականին` Ղարաբաղյան հակամարտությունից մեկ ամիս առաջ, երբ 13 տարեկան է եղել։
Ըստ ադրբեջանական ԶԼՄ-ների` Աշոտյանը պատմել է, որ արձակուրդն անցկացրել է Բաքվում, քանի որ մայրն այդ քաղաքում է ծնվել։
«Մենք այստեղ տուն ենք ունեցել։ Ուրախ եմ, որ ադրբեջանցի գործընկերները հանդես եկան Բաքվում համաժողով անցկացնելու նախաձեռնությամբ։ Այլապես այլ պատրվակով դժվար կլիներ Ադրբեջան գալ», — ասել է նա։
Ավելի վաղ պատգամավորն այս մասին պատմել էր նաև հայկական ԶԼՄ-ներին։
Հակահայկական քարոզչության դեմ
Մանկության հուշերը չեն խանգարել, որ Աշոտյանը կրկին հանդես գա հակահայկական քարոզչության դեմ։
Նա իր ելույթում ընդգծել է` հակամարտություններում տուժում են հակամարտող բոլոր կողմերը, ուստի անհրաժեշտ է լսել բոլոր կողմերին և առկա հարցերը քննարկել մարդու իրավունքների և մարդասիրության շրջանակներում՝ անկախ քաղաքական, էթնիկական և կրոնական տարբերություններից:
Աշոտյանը հորդորել է նաև ադրբեջանական կողմին գալիք սերունդներին չսնել հայատյացությամբ և քսենոֆոբիայով, ինչն իր բացասական հետևանքներն է ունենալու ողջ տարածաշրջանի համար:
Նա ընդգծել է, որ Բաքվում հայկական պատվիրակության ներկայությունը թշնամանք չտարածելու հնարավորություն է։
Տեխնիկական խնդիրներ
Հայկական պատվիրակության այցը Բաքվում հարթ է անցել։ Որոշակի խնդիրներ են ծագել վրաց-ադրբեջանական սահմանին, քանի որ սահմանապահները չեն հավատացել, որ Հայաստանից պատգամավորներ են մեկնում Բաքու։
Սակայն ամեն ինչ բարեհաջող է ավարտվել։ Բաքվում հայ պատգամավորների անվտանգության հարցերով զբաղվել է «Եվրանեսթի» քարտուղարությունը։
«Եվրանեսթ» խորհրդարանական վեհաժողովի հայաստանյան պատվիրակության ղեկավար Արմեն Աշոտյանն ու պատվիրակության անդամ Մանե Թանդիլյանը սեպտեմբերի 21-ից Բաքվում մասնակցում են վեհաժողովի սոցիալական, կրթության, մշակույթի և քաղաքացիական հասարակության հարցերի հանձնաժողովի կազմակերպած համաժողովին:
Համաժողովը նվիրված է կանանց առողջության և գենդերային հավասարության խթանմանը:
