ԵՐԵՎԱՆ, 17 հուլիսի — Sputnik. Հայաստանում ռուսերենը պետական լեզվի կարգավիճակ չի ստանա, Երևանի օրակարգում այդ հարցը դրված չէ։ Sputnik Արմենիայի հետ զրույցում այդ մասին ասաց ՀՀ ԱԺ արտաքին հարաբերությունների մշտական հանձնաժողովի նախագահ Արմեն Աշոտյանը, որը հայկական պատվիրակության կազմում ներկա պահին պաշտոնական այցով Մոսկվայում է։
Ավելի վաղ տեղեկություն էր տարածվել, որ Հայաստանի ԱԺ նախագահ Արա Բաբլոյանի հետ հանդիպման ժամանակ Պետդումայի խոսնակ Վյաչեսլավ Վոլոդինը Հայաստանի իշխանություններին առաջարկել է ռուսաց լեզուն պետական լեզու դարձնել, որպեսզի հայկական վարորդական իրավունքները վավեր համարվեն Ռուսաստանի տարածքում։
«Ի սկզբանե ուզում եմ կանխել անառողջ քննարկումները, որոնք մեծ մասամբ առաջացել են ԶԼՄ–ների թույլ տված սխալի պատճառով, նրանք տարածել էին միայն Վյաչեսլավ Վոլոդինի ասածը` չհիշատակելով հայկական կողմի հիմնավորումը։ Մինչդեռ ելույթի ընթացքում ես հնչեցրել էի մեր դիրքորոշումը։ Ռուսաց լեզուն մեզ համար համաշխարհային նշանակություն ունի, սակայն մեր օրակարգում չկա և չի լինելու ռուսաց լեզվին պաշտոնական լեզվի կարգավիճակ տալու և Սահմանադրության մեջ այն ամրագրելու մասին հարցը», – ասաց Աշոտյանն` ավելացնելով, որ ռուսական կողմի հետ` հայկական վարորդական իրավունքների վերաբերյալ բանակցությունները կշարունակվեն այլ ձևաչափներում։
Հունիսի 1-ից օտարերկրյա վարորդական իրավունքներ ունեցող քաղաքացիներն այլևս պրոֆեսիոնալ վարորդներ աշխատելու իրավունք չունեն Ռուսաստանում։ Օրենքն ընդունվել է, որովհետև Ռուսաստանի ավտոճանապարհներին այլ երկրների քաղաքացիների մասնակցությամբ ՃՏՊ–ներն ավելացել են։ Օրենքը խախտելու դեպքում այն պաշտոնյաները, որոնք թույլ կտան վարորդներին ավտոմեքենաները վարել առանց ռուսական վարորդական իրավունքի, կտուգանվեն 50 հազար ռուբլու չափով։ Սակայն որոշումը չի տարածվում Բելառուսի և Ղրղըզստանի քաղաքացիների վրա։ Վյաչեսլավ Վոլոդինի պարզաբանմամբ` դա պայմանավորված է այն հանգամանքով, որ նշված երկրներում ռուսերենը պետական լեզու է համարվում, և քաղաքացիները ճանապարհային երթևեկության կանոնները սովորում են ռուսերենով։
