ԵՐԵՎԱՆ, 21 սեպտեմբերի — Sputnik. Շախմատի աշխարհի գավաթի խաղարկության կիսաեզրափակիչում Լևոն Արոնյանի ու Մաքսիմ Վաշյե Լագրավի խաղում առաջին անգամ այս մրցումների ընթացքում հաղթողին որոշելու համար պահանջվեց անցկացնել «մահվան» պարտիան:
Լևոն Արոնյանի և Մաքսիմ Վաշյե Լագրավի հակամարտությունը շատ լարված ու համառ ստացվեց: Դասական պարտիաներում ոչ ոքի խաղալուց հետո, կողմերը մեկական հաղթանակ տարան արագ շախմատում: Հետո ևս երկու պարտիաներում մրցակիցները միավորը կիսեցին:
Գործը հասավ «մահացու» պարտիային: Այս պարտիայում սպիտակներին տրվում է 5 րոպե, իսկ սևերին` չորս: Ոչ ոքիի դեպքում հաղթանակը շնորհվում է սև խաղաքարերով հանդես եկող շախմատիստին: Արոնյանը խաղում էր սպիտակներով ու հիանալի կարողացավ օգտագործել նյութական առավելությունը ու, զինվորը վերածելով թագուհու, շատ կարևոր հաղթանակ տոնեց:
Աշխարհի գավաթի խաղարկության եզրափակիչում Լևոն Արոնյանը մրցելու է չին շախմատիստ Լիրեն Դինգի հետ, որը կիսաեզրափակիչում առավելության հասավ Վեսլի Սոյի նկատմամբ: Երկու շախմատիստներն էլ արդեն կատարել են կարևոր առաջադրանքը` վաստակելով 2018 թվականի հավակնորդների մրցաշարի ուղեգիր: Բայց, բնականաբար, ոչ ոք չի ուզում պարտվել եզրափակիչում:
Աշխարհի գավաթի խաղարկության եզրափակիչում արդեն ի տարբերություն նախորդ փուլերի շախմատիստները դասական չորս պարտիա են անցկացնելու երկուսի փոխարեն: Ոչ ոքիի դեպքում արդեն նույն կանոնակարգն է գործելու:
