ԵՐԵՎԱՆ, 20 սեպտեմբերի — Sputnik. Իսլամացած հայերը արդեն չեն վախենում ասել, թե ով ենք իրենք, ասաց ՀՀ Սփյուռքի նախարար Հրանուշ Հակոբյանը` ելույթ ունենալով Հայաստան-Սփյուռք համահայկական 6-րդ համաժողովին։
«Աշխարհում բնակվող ավելի քան 9 մլն հայերից երկու միլիոնն իսլամացած հայեր են, սակայն նրանք այլևս չեն թաքցնում իրենց ով լինելը», — նշեց Հակոբյանը։
Նրա խոսքով` հայեր կան աշխարհի գրեթե բոլոր անկյուններում` ԱՄՆ-ից մինչև Վրաստան։ Հայկական համայնքները ներկայացված են աշխարհի 118 երկրում, և նրանցից յուրաքանչյուրը գործում է յուրովի։ Նախարարի գնահատականով` հայերը տարբերվում են արագ ադապտացվելու ունակությամբ։ Նրանք ակտիվ մասնակցություն են ցուցաբերում կոնկրետ երկրի տնտեսական, քաղաքական, մշակութային կյանքում։
«Այսօր աշխարհում 829 հայկական համայնք կա, 30 հազար հայկական կազմակերպություն, 724 գործող եկեղեցի, ավելի քան 1000 դպրոց և 300 գործող հայկական ԶԼՄ», — ասաց Հակոբյանը։
Սակայն շատ դժվար է վերահսկել ձուլման գործընթացը։ Տարեցտարի սփյուռքում ավելանում է խառնամուսնությունների և նման ընտանիքներում ծնված երեխաների թիվը, որոնք հայերեն չեն խոսում։
«Հայերեն գիտեն միայն հայերը։ Ո՞վ է հայերեն սովորելու, եթե ոչ հայերը», — ասաց նախարարը։
Նրա խոսքով` ընտանիքը, կրոնը, լեզուն և դպրոցը հայապահպանության հիմնական գործոններն են։
Նշենք, որ Հայաստան-Սփյուռք համահայկական վեցերորդ համաժողովը մեկնարկել է սեպտեմբերի 18-ին: Համաժողովն անցկացվում է 4 ուղղությամբ՝ Հայաստանի զարգացման հիմնախնդիրներ, Հայաստանի Հանրապետության պաշտպանական քաղաքականության առանձնահատկությունները ժամանակակից մարտահրավերների պայմաններում, Արտաքին քաղաքականության օրակարգ, Հայապահպանության հիմնախնդիրներ:
Մեծ պատվիրակություններ են ժամանել ՌԴ-ից (259), ԱՄՆ-ից (213), Ֆրանսիայից (92), Լիբանանից (107), Սիրիայից (44), Իրանից (56), Արգենտինայից (35), Կանադայից, Թուրքիայից, Վրաստանից: Առաջին անգամ համաժողովին մասնակցում են Մալայզիայի, Թայլանդի, Սինգապուրի, Ճապոնիայի, Մեքսիկայի, Եթովպիայի, Սուդանի, Մյամարի համայնքների ներկայացուցիչներ:
Մասնակիցների 35 տոկոսից ավելին կանայք են, մոտ 20 տոկոսն են կազմում երիտասարդները:
