ԵՐԵՎԱՆ, 20 սեպտեմբերի — Sputnik, Դիանա Հարությունյան. Հայ- թուրքական հարաբերություններին խոչընդոտում է Թուրքիայում քաղաքական կամքի ու ցանկության բացակայությունը, թուրքագետ Վարուժան Գեղամյանը հենց դա է համարում Հայաստանի նախագահի՝ ՄԱԿ-ում ունեցած ելույթի հայ-թուրական հարաբերություններին վերաբերող հատվածի հիմնական ասելիքը:
Ըստ նրա՝ Սերժ Սարգսյանի ելույթն արտառոց չէր: Այն, պարզապես, միջազգային հանրությանը հերթական անգամ հիշեցում էր, որ գնդակը շարունակում է մնալ թուրքական դաշտում: Հայաստանի ռազմաքաղաքական ղեկավարությունն, ըստ փորձագետի, վստահ է, որ Թուրքիայի նախագահ Էրդողանն այս պահին չի գնա այդ հարաբերությունների փոփոխության:
«Այս պահին հայ-թուրքական հարաբերությունների կարգավորման համար բավարար պայմաններ չկան:Թուրքիայում նախագահական ընտրություններ են 2019-ին: Հաշվի առնելով սպասվող քաղաքական ու սոցիալական իրողությունները, ավելի քիչ հավանական է դառնում, թե Թուրքիան կանդրադառնա հայ-թուրքական արձանագրություններին: Իսկ Հայաստանի նախագահն արդեն հայտարարել է, որ այդ արձանագրությունները հայկական կողմը ևս հանում է շրջանառությունից։ Ստացվում է՝ այդ արձանագրությունների պատմությունն արդեն ավարտված կարելի է համարել»,- ասաց Վարուժան Գեղամյանը։
Նախագահ Սերժ Սարգսյանը սեպտեմբերի 19-ին Նյու Յորքի ՄԱԿ-ի կենտրոնակայանում մասնակցել է Գլխավոր ասամբլեայի 72-րդ նստաշրջանին, որտեղ հանդես է եկել ելույթով: Հանրապետության նախագահն իր ելույթում անդրադարձել է հայ-թուրքական հարաբերություններին, ինչպես նաև հայ-թուրքական արձանագրություններին:
Նախագահը, մասնավորապես, ասել է, որ այդ փաստաթղթերն առ այսօր չեն վավերացվել և հանգրվանել են պաշտոնական Անկարայի մութ գզրոցներում: Թուրքիայի կառավարությունը անհեթեթ նախապայմաններ է առաջ քաշում դրանք վավերացնելու համար, որոնք բնավ չեն բխում արձանագրությունների ոգուց: Դրանց կենսագործման ուղղությամբ շարունակաբար որևէ դրական տեղաշարժի բացակայության պայմաններում Հայաստանն այդ երկու արձանագրությունները հայտարարելու է առ ոչինչ: Մենք 2018 թվականի գարուն ենք մտնելու առանց այդ սին արձանագրությունների:
Նախագահը հիշեցրել է՝ հաջորդ տարի Միավորված ազգերի ընտանիքը նշելու է Ցեղասպանության հանցագործությունը կանխարգելելու և պատժելու մասին կոնվենցիայի 70-ամյակը: Հայաստանն այդ առթիվ հանդես է գալու նոր նախաձեռնությամբ։
