ԵՐԵՎԱՆ, 20 սեպտեմբերի-Sputnik. ՄԱԿ-ի գլխավոր ասամբլեայում հայ-թուրքական արձանագրությունների վերաբերյալ ՀՀ նախագահի հայտարարությունը Կիրո Մանոյանը գնահատում է դրական ու մի քիչ էլ ուշացած: Այդ մասին նա խոսեց Հայաստան-Սփյուռք համաժողովից հետո: Կիրո Մանոյանը կարծում է՝ արձանագրությունները հետ կանչելու մասին պետք էր խոսել հենց այն ժամանակ, երբ դա հանվեց ԱԺ օրակարգից: Նա հիշեցրեց նախագահի ելույթից մի հատված, երբ Սերժ Սարգսյանն ասաց, որ կսպասեն մինչև 2018 թվականի գարուն՝ մինչ արձանագրությունները հետ կանչելը:
«Նախագահը ժամանակ է տալիս ոչ թե Թուրքիային, այլ միջնորդներին ու հովանավորներին, որպեսզի, եթե անելիք ունեն, անեն: Հուսով եմ, որ չեն անի»,- ասաց Մանոյանը:
Կիրո Մանոյանն անդրադարձավ նաև Արցախի հիմնախնդրի կարգավորման գործընթացին: Ըստ նրա՝ ՀՀ նախագահ Սերժ Սարգսյանը կարևոր շեշտադրում արեց այն մասին, որ պետք չէ Արցախի՝ որպես պետություն չճանաչված լինելը խանգարի Արցախում բնակվող ժողովրդի իրավունքների իրացմանը:
«Երբեմն որոշ պետություններ կամ միջազգային կառույցներ այնպես են վերաբերվում, որ Արցախը միջազգային ճանաչում չունի, այսինքն՝ արցախցիներն էլ իրավունք չունեն: Մարդկային իրավունք բոլորը պետք է ունենան: Այդ շեշտադրումը կարևոր է այն իմաստով, որ պետք չէ անտեսել այնտեղ բնակվող մարդու իրավունքները»,- ասաց նա:
Նրա վստահեցմամբ՝ ՄԱԿ-ի գլխավոր ասամբլեայում ելույթներն անմիջական արդյունքի ակնկալիքով չեն հնչում, այնտեղ պետությունների ղեկավարներն ու առաջնորդներն աշխարհի լսարանին ներկայացնում են իրենց քաղաքականության որոշ կետերը:
Տեղեկացնենք, որ դա Սերժ Սարգսյանի վերջին ելույթն էր ՀՀ նախագահի պաշտոնում: Կիրո Մանոյանի դիտարկմամբ՝ Սարգսյանը փորձեց բավականին ուժեղ շեշտադրում անել մեր հիմնական խնդիրների վրա. արցախյան հարց ու Թուրքիայի հետ հարաբերություններ:
