ԵՐԵՎԱՆ, 20 սեպտեմբերի — Sputnik. Պետք է լարել ջանքերը Արցախի միջազգային ճանաչման շուրջ: Այս մասին Հայաստան-Սփյուռք համաժողովի ժամանակ ասաց փոխարտգործնախարար Շավարշ Քոչարյանը:
«Ադրբեջանը գործում է միջազգային իրավունքի դեմ, Ադրբեջանը գործում է Ռուսաստանի, ԱՄՆ-ի, Ֆրանսիայի կոչերի և հորդորների դեմ: 2016 թվականին այդ երկիրը շատ հստակ ցույց տվեց այն, ինչ հայերի համար վաղուց հայտնի էր, բոլորի համար իրական դեմքը երևաց»,-ասաց Քոչարյանը:
Ադրբեջանի համար բանակցային գործընթացն ընդամենը բարենպաստ հող է իր քարոզչական պատերազմն ու կեղծիքը շարունակելու համար:
«Նախորդ տարվա գործողությունը 90-ականների գործողության կրկնությունն էր: Մինչ այդ միշտ եղել են հրադադարի ռեժիմի խախտումներ: Բայց այն, ինչ տեղի ունեցավ նախորդ տարի, բացահայտ ռազմական գործողությունների վերսկսում էր»,- ասաց փոխարտգործնախարարը:
Եռօրյա այս համաժողովի ընթացքում որոշվել է Հայաստան-Արցախ-Սփյուռք համագործակցության նոր մեթոդներ կիրառել Արցախի միջազգային ճանաչման համար:
Շավարշ Քոչարյանը նշեց, որ Ադրբեջանն ամեն անգամ կրկին հայտնվում է ագրեսորի կարգավիճակում, թույլ է տալիս մարդասիրական իրավունքի կոպիտ խախտումներ, իսկ դա Սփյուռքի ջանքերով պետք է մշտապես ի ցույց դնել աշխարհին:
Երևանում սեպտեմբերիր 18-20-ն անցկացվող «Հայաստան — Սփյուռք» համաժողովին մասնակցում է ավելի քան 1800 մարդ աշխարհի 71 երկրից։ Նրանցից 35%-ը կանայք են, 25%-ը` երիտասարդներ։ Համաժողովին մասնակցում են ավելի քան 90 խմբագիր ու լրագրող, տարբեր կազմակերպությունների ավելի քան 100 մասնակից, դեսպաններ ու միջազգային կազմակերպությունների ներկայացուցիչներ, հայեր Ռուսաստանից, Կանադայից, Լիբանանից, Սիրիայից, Վրաստանից ու Արցախից։
