Դիանա Հարությունյան, Sputnik.
Քննարկման թեման Ռազմական հակամարտությունների գոտիներում երեխաների պաշտպանությունն է եղել, դրան նախորդել է տեղեկատվական հուշագրի ներկայացում այն մասին, թե ինչ է տեղի ունեցել աշխարհի տարբեր երկրներում:
Sputnik Արմենիայի հետ զրույցում Փարիզում գտնվող Ազգային Ժողովի նախագահի տեղակալ Միքայել Մելքումյանը, պատմեց, որ ադրբեջանցի պատվիրակ Ֆատալիևան իր զեկույցում մի քանի կետով անդրադարձել է նաև Լեռնային Ղարաբաղի հակամարտությանը: Մասնավորապես, նա Արցախն Ադրբեջանի մաս է համարել, խոսել Ադրբեջանում զոհված 2– ամյա երեխայի մասին, նաև ներկայացրել ուռճացված թվեր` ադրբեջանցի փախստականների մասին:
Հայկական կողմը, նախօրոք իմանալով այս մասին, կարողացել է ապացուցել, որ սա միակողմանի զեկույց է ու հասել նրան, որ զեկույցն օրակարգից հանվի և փոխվի:
«Այնքան ակնհայտ էր ամեն բան, որ անգամ ադրբեջանցիներին պաշտպանող պատվիրակները հանդես եկան մեր դիքերից»,- Փարիզից մեզ հայտնեց Միքայել Մելքումյանը:
Ադրբեջանցի պատվիրակն, ի դեպ, ներկայացնելով Արցախը որպես Ադրբեջանի մաս, հղում է արել ԵԱՀԿ ՄԽ ձևակերպումներին: Հայկական կողմը հակադարձել է՝ այդպիսի բան չկա, առհասարակ: Ադրբեջանական կողմը փորձում է միջամտություններ անել անգամ միջազգային ձևակերպումներում:
Միքայել Մելքումյանը նաև Ֆատալիևայի հետ է զրուցել: Այն, որ փոփոխություններ կլինեն զեկույցում, չի կասկածում: Ամենաբարդը կլինի հենց Արցախի մասով այդ ձևակերպումը փոխելը:
Մելքումյանն էլ հադես է եկել զեկույցով, որտեղ խոսել է ապրիլյան դեպքերի ու դպրոցի բակում զոհված 12- ամյա Վաղարշակի մասին:
Ըստ ԵԽԽՎ կանոնակարգի` միակողմանի զեկույցը հիմք է, որ փոխվի զեկուցողը: Հայկական կողմն առայժմ զեկույցում է փոփոխություն պահանջել: Ինչ տեսք կունենա նոր զեկույցն ու ինչպես հետո դրա դեմն առնել` հետագա անելիքների շարքում է:
